«Мың бала» олимпиадасының жеңімпаздары мен халықтың әлеуметтік қорғалмаған санатындағы балаларға квота беріледі, деп хабарлайды @Pavlodarnews.kz тілшісі.

Павлодар облысындағы 14 мамандандырылған мектеп жаңадан келгендерге есігін айқара ашты. Қабылдау екі кезеңнен – құжаттарды тапсыру және тестілеуден тұрады. Бұл тәжірибе үнемі қолданылып келеді, бірақ соңғы үш-төрт жылдан бері іріктеуді Білім министрлігіне қарасты «Дарын» орталығы жүргізіп келеді. Барлық ақпарат, яғни тіркелу ережелері, құжаттарды тіркеуге, мектептердегі бос орындары, тест нәтижелері туралы https://qabyldau.daryn.kz/kz/index.php сайтында орналастырылады.

Конкурсқа қатысу үшін құжаттарды 15 сәуірге дейін тапсыру қажет. Қабылдау емтиханы 15 мамырдан 15 маусымға дейін әр сенбі және жексенбі күндері офлайн режимде өтеді.

– Мамандандырылған мектепке түсу үшін бір ғана мүмкіндік беріледі. Бір мезгілде бірнеше мектепті таңдап, қабылдау емтиханды тапсыруға болмайды, – дейді мектепке дейінгі және жалпы орта білім беру бөлімінің меңгерушісі Нұргүл Шалабайқызы.

Әр мектеп өзінің бос орындары туралы ақпарат ұсынады, бұл ақпаратты веб-сайтта да табуға болады.

Оқушыларды іріктейтін мектептердің тізімі:

• Дарынды балаларға арналған №3 гимназия бесінші сыныптарға 50 оқушыны қабылдауға дайын;
• «Жас дарын» мамандандырылған мектеп-лицейі бесінші сыныпқа 72, жетінші сыныпқа 36 оқушыны іріктеп алады;
• Екібастұз қаласындағы мемлекеттік тілде оқытатын дарынды балаларға арналған «Зерде» мамандандырылған жалпы білім беру мектебінің 5-сыныптарына 50 орын бос;
• Дарынды балаларға арналған Абай атындағы мамандандырылған гимназияда 5-сыныптарға 50 орын және 7-сыныптарға 22 орын бос;
• Дарынды балаларға арналған № 8 лицей-мектебінде 5-сыныптарға 100 бала іріктеледі;
• Ы.Алтынсарин атындағы дарынды балаларға арналған облыстық қазақ гимназия-интернатында 5-сыныптарға 48 оқушыны қабылдайды;
• Дарынды балаларға арналған облыстық көпсалалы лицей-интернатына 7-сыныптарға 68 орын бос;
• Екібастұз қаласының дарынды балаларға арналған мамандандырылған №1 лицей-мектебі 5-сыныптарға 50 оқушыны қабылдауға дайын;
• Ақсу қаласының Қ, Сәтбаев атындағы дарынды балаларға арналған мамандандырылған гимназияға 5-сыныптарда 48 орын;
• Қабанбай батыр атындағы «Жас сарбаз» облыстық мамандандырылған лицей-мектеп-интернатына 7-сыныптарға 36 бос орын бар;
• Музыкалық мектеп интернат жыл сайын 1-сыныпқа музыкалық тыңдау жүргізеді.

Ал дарынды қыздарға арналған «Білім-Инновация» мектеп-интернатына, дарынды ұл балаларға арналған «Білім-Инновация» мектеп-интернатына, дарынды балаларға арналған облыстық көпсалалы көптілді мектеп-интернатына конкурстық іріктеу үшін құжаттарды қабылдау 1 ақпан мен 12 сәуір аралығында аудан орталықтарында мектептер базасында жүргізіледі. Конкурс барысын «Білім-Инновация» халықаралық қорының лицей өкілдерінен құралған көшпелі комиссия қадағалайды.

Бірақ соған қарамастан жазылғысы келетіндердің кезегі қалыптасуда.

– Бұл кезек тұрғын үй алу кезегі тәрізді, яғни кезекте тұрған бала шығып кеткен оқушының орнына түседі. Бірақ оқушыбарлық критерийлерден өтіп, қалаған мектепке түспеген жағдай ешқашан болған емес, – деп қосты басшы.

Кезектен және байқаудан тыс – «Мың бала» республикалық зияткерлік олимпиадасының ауыл мектептерінің жеңімпаздары қабылдау квотасына ие болады және олар кез келген мамандандырылған мектепті таңдай алады. Сондай-ақ 5, 6, 7, 8 және 10-сыныптарға қабылданған халықтың осал санатындағы балаларға 15 пайыздық квота беріледі.