Өтінімдер Business.enbek.kz порталы арқылы онлайн режимде қабылданады, деп хабарлайды @Pavlodarnews.kz.

Бұл туралы Павлодар облысы жұмыспен қамтуды үйлестіру және әлеуметтік бағдарламалар басқармасының басшысы Альмира Дисюпова Instagram-дағы парақшасында мәлім етті. 

– Павлодар облысында 20 ақпан - 3 наурыз аралығында өз ісін ашуға ниетті кәсіпкерлерге 400 АЕК, яғнм 1 миллион 380 мың теңге көлеміндегі мемлекеттік гранттың бірінші легі бойынша өтінім беру басталады. Өтінімдер жыл бойы төрт лекпен қабылданады деп жоспарлануда, – деп жазды Альмира Дисюпова.

Қатысу үшін үміткер порталға электрондық цифрлық қолтаңба (ЭЦҚ) арқылы тіркеліп, өтінім бере алады.

Грантқа өтінім берушілер төмендегі әлеуметтік санаттардың бірінен болуы керек:

• Еңбекке қарсы көрсетілімдері жоқ мүгедектігі бар адамдар;
• Қолданыстағы «қандас» мәртебесі бар адамдар;
• Өңіраралық қоныс аударушылар;
• Еңбекке қабілетті атаулы әлеуметтік көмек алушылар, көп балалы отбасыларға және (немесе) оның жұбайына (зайыбына) төленетін жәрдемақы алушылар;
• Мүгедектігі бар баланы тәрбиелеп отырған адам (жұбайы / зайыбы);
• Асыраушысынан айырылу бойынша жәрдемақы алушылар.

Өтінім беру үшін қажет:

1. «Business.enbek.kz» порталда тіркелу;
2. Грант алу шарттарына сәйкестігіне тексеруден өту;
3. Порталда көрсетілген бизнес жоспар үлгісін жүктеп алып, оны толтыру және порталға енгізу (өз бетінше жасаған бизнес жоспар жарамайды);
4. Өтініш нысанын толтыру және электрондық цифрлық қолтаңба кілтімен қол қою.

Сонымен қатар, үміткердің «Бастау Бизнес» жобасы бойынша кәсіпкерлік негіздеріне оқыту туралы 3 жылдан аспайтын мерзімге сертификаты болуы тиіс.

Интернетке немесе компьютерге қолжетімділік болмаған жағдайда халықты жұмыспен қамту орталықтарының өзіне-өзі қызмет көрсету аймақтарында өтінім беруге болады.

Фото: Константин Шелков