Осы уақыт аралығында Шідерті, Майқайың, Спутник ауылдарының халқы «Саламатты Қазақстан» пойызында қаралды, деп хабарлады @Pavlodarnews.kz.

Медициналық «Саламатты Қазақстан» пойызына 28 тамыздан 30 тамыз аралығында Павлодар облысының шамамен төрт жүз тұрғыны жүгінді. 28 тамызда Шидерті кентінде 140 адам, 29 тамыз күні Майқайың ауылында 82 адам, ал 30 тамызда Спутник ауылында 165 адам қабылданды.

Пациенттер негізінен окулист, ЛОР-дәрігер, невропатолог және терапевт мамандарына жүгініп, профилактикалық УДЗ тексеруден өтіп, анализ тапсырды.

Ерекше көңіл балаларға бөлінді: ата-аналар жаңа оқу жылының алдында оларды профилактикалық тексеруден өткізуге белсенді түрде әкелді.

Пациенттерді қабылдау 09:00-ден 18:00 уақыт аралығында жүргізіледі.

Еске сала кетейік, 28 тамызда 26 ақ халатты маман мінген пойыз Шідерті ауылына келіп тоқтады. Бір апта бойы, атап айтқанда 28 тамыздан 4 қыркүйеккке дейін Павлодар облысының шалғайдағы елді мекендердің тұрғындарына медициналық, заңдық және медиаторлық көмек ұсынылады. Медициналық пойыздың алғашқы бекеті Маңғыстау облысынан басталды. Бүгінгі күнге дейін пойыз 7 аймақты аралап үлгерді. Медициналық пойыз 31 тамызда және 1 қыркүйекте Шарбақты, ал 2 және 3 қыркүйекте Көктөбеде болады. Соңғы аялдама Жұмыскер ауылында болады деп жоспарланған. Медициналық пойыз ол жерге 4 қыркүйекте жетеді.