2025 жылға дейін облыста санитарлық автопарк толығымен жаңартылады, деп хабарлайды  @Pavlodarnews.kz.

Өңірдегі шалғай ауылдардың дәрігерлері 31 ГАЗель көлігінің кілтін алды.

– Бұл бірінші және соңғы партия емес, – деп атап өтті Павлодар облысының әкімі Асайын Байханов. – Екі жыл ішінде шалғай ауылдардағы санитарлық көліктерді толығымен жаңартуды жоспарлап отырмыз. Барлық техника медицина саласында сапалы қызмет көрсетуді қамтамасыз етуге арналған. 

Денсаулық сақтау басқармасының басшысы Айдар Сейітқазиновтың айтуынша, басқарма жыл сайын автомобиль сатып алуды жоспарлап отыр. Биылғы жылы ауылдық медициналық пункттер 37 санитарлық көлік алса, келесі жылы тағы 39 көлікпен қамтылады.

– 2017 жылдан бастап санитарлық көлік сатып алынбаған еді, бірақ мемлекет тарапынан қолдау көрсетілуінің нәтижесінде автопаркті жаңарта бастадық. Бұл бағыттағы жұмыстар 2025 жылға дейін аяқталады деп үміттенемін, – деп атап өтті Айдар Сейітқазинов.

Басқарма басшысы бұл көліктер тек пациентті медициналық мекемелерге тасымалдауға және алғашқы медициналық көмек көрсетуге арналғанын атап өтті.

– Біз санитарлық көлікті асыға күткен едік, – дейді Шарбақты аудандық ауруханасының бас дәрігері Жанар Бекенова. – Шалғайдағы ауылдық округтерге үш жаңа көлік жіберіледі: Шалдай, Галкино және Хмельницкий ауылдары. 

Дәрігердің айтуынша, ауданда он санитарлық машина бар.