Сағат 11:30-дағы жағдай бойынша республикалық және облыстық маңызы бар барлық жолдар ашылды, деп хабарлайды  @Pavlodarnews.kz тілшісі.

Облыстық ТЖД баспасөз қызметінің мәліметінше,  халықты ескерту мақсатында жеті СМС-хабарлама таратылды. «Дәрмен» мобильдік қосымшасы арқылы  тоғыз хабарлама, екі телерадиоқабылдау жіберілді.

– Бір түнде облыс бойынша жалпы саны 354 көлік жиналып қалған. Оның ішінде 232-сі – жүк көлігі, 116-сы – жеңіл автомобиль, алтауы – автобус. Ондағы адамдар саны – 642, оның ішінде сегізі – бала, – деді департаментте. 

Жылыту пункттерінде болған адамдардың жалпы саны – 112 адам, оның ішінде төртеуі –  бала.

«Vita» еріктілері Екібастұз қаласының төтенше жағдайлар басқармасымен бірлесіп, Астана-Павлодар тас жолында жүргізушілер үшін пісірмелер мен ыстық шай  таратты.

Еске сала кетейік,  8 ақпан күні сағат 19:20-дан бастап ауа райының нашарлауына байланысты Атамекен кентінен Шідерті кентіне дейінгі Қызылорда-Павлодар республикалық маңызы бар автожол учаскесінде көлік қозғалысы жабылған болатын.