Арнайы шаңсорғыш пен құралдар мамандарға 10 кВ кернеу үстінде қауіпсіз жұмыс істеуге мүмкіндік береді, деп хабарлайды @Pavlodarnews.kz тілшісі.

«ПАВЛОДАРЭНЕРГО» АҚ баспасөз қызметінің мәліметінше, енді трансформаторлар мен тарату құрылғыларын тазалау және техникалық қызмет көрсету жұмыстары тұтынушыларды электр қуатынан ажыратпай жүргізіледі.

Бұл жаңашылдық арнайы жабдықтар мен жеке қорғаныс құралдарының сатып алынуының арқасында мүмкін болды. Жұмыста кернеуі 10 кВ-қа дейінгі жабдықты қауіпсіз тазалауға мүмкіндік беретін оқшаулағыш қондырғылары бар «Kärcher» өнеркәсіптік шаңсорғышы пайдаланылады. Диэлектрлік қолғаптар, арнайы саптамалар және жеке қорғаныс құралдары мамандардың толық қауіпсіздігін қамтамасыз етеді.

– Бұрын мұндай жұмыстар үшін электр энергиясын өшіруге тура келетін. Қазір жоқ. Біз жабдықты кернеу үстінде тазалаймыз және бұл мүлде қауіпсіз. Тұтынушылар қосалқы станцияда техникалық қызмет көрсетіліп жатқанын да байқамайды, – деді қалалық электр желілері кәсіпорнының директоры Олег Клочков.

Тұрақты тазалау аса маңызды, себебі оқшаулағыштардағы шаң қысқа тұйықталуға және электрмен жабдықтаудағы іркілістерге әкелуі мүмкін.

Жаңа технологияны енгізбес бұрын қызметкерлер Татарстан Республикасының Заинск қаласында қарқынды оқудан өтіп, қажетті білім алып, тәжірибелік дағдыларын жетілдірді.

– Басында сәл үйреншікті емес болды. Бірақ оқудан кейін бәрін түсіндік, – дейді 3-разрядты электрослесарь Жалғас Бахпаев. – Қазір біз бұл технологияны сенімді қолданамыз. Ең бастысы – қауіпсіздік, тіпті кернеу үстінде жұмыс істегенде де.

Павлодарлықтар енді техникалық қызмет көрсету кезінде де электрмен жабдықтау тұрақты болатынына сенімді бола алады. Бұған жаңа технологиялар мен мамандардың жоғары дайындығы себеп болып отыр.