Шаһарда «Дауылды жырдың дүлдүлі – Иса ақын» атты әдеби сазды кеш өтті, деп хабарлайды  @Pavlodarnews.kz тілшісі.  

Бұқар жырау атындағы әдебиет және өнер музейі «Ұлттық рухани жаңғыру» ұлттық жобасы аясында ақын, әнші, композитор Иса Байзақовтың 125 жылдығына орай әдеби сазды кеш ұйымдастырды.

– Иса Байзақов – қолына домбырасы мен қаламын қатар ұстаған дарынды импровизатор, жазба әдебиеттің көрнекті қаламгері. Оның шығармашылығын насихаттау және жастар арасында әдебиет пен бейнелеу өнеріне қызығушылықты арттыру, өнердің синтезін көрсету мақсатында аталмыш іс-шараны ұйымдастырып отырмыз,  – дейді музей қызметкері Абзал Рымбек.

Әдеби-сазды кеш аясында жергілікті Қазақстан Жазушылар одағының мүшелері, ақын, жазушы, журналистер Иса Байзақовтың өмірі мен шығармашылығы туралы сөз қозғап, тың деректермен бөлісті. 

Павлодар облысының құрметті азаматы, Қазақстан Жазушылар одағының мүшесі Шолпан Байғалы Исаның әніменен, желдірмесімен, айтыстарымен тәрбиеленгендерін тілге тиек етті. 

– Негізі Исаның  алты жасынан бастап айтысқа бейімділігі болған деседі. Ең алдымен ол өзінің туған апасымен үйде отырып, екеуі өзара айтысып бастаған. Әрі қарай қабілетінің ашылуына, одан әрі дамуына қоғамдағы болып жатқан аумалы-төкпелі дүниелер әсер етті деп білеміз. Енді міне, жерлесіміздің мерейтойын Ертіс өңірі жаппай тойлап жатыр. Жастарға насихат, үлгі беретін осындай шаралардың ұйымдастырылып жатқанына дән ризамын, – дейді Шолпан Байғалы. 

Жиын барысында өңірімізге белгілі айтыскер ақын Мизан Жұмәлі Иса Байзақовтың көп жерде айтыла бермейтін «Қалқа» әнін тамылжыта орындаса, дәстүрлі әнші Мағжан Ысқақ ақынның атақты «Желдірмесін» паш етті. Ал, жас әнші Әміржан Нұрлы Үкілі Ыбырайдың «Қызыл асық» әнін шырқады.

Айта кетерлігі, іс-шара барысында Иса Байзақовтың 125 жылдығына орай өткен «Бір сурет – бір өлең» атты қалалық өнер байқауының  жеңімпаздары марапатталды. Байқауға 16-20 жас аралығындағы Павлодар қаласының мемлекеттік тілде білім алатын мектеп оқушылары мен студенттері қатысты.