Демалыс күндері полиция алты осындай фактіні тіркеп, жүргізушілердің әрекеттеріне тосқауыл қойды, деп хабарлайды @Pavlodarnews.kz тілшісі.

Облыстық полиция департаменті баспасөз қызметінің мәліметінше, мас күйінде көлік жүргізген жүргізушілердің бірі Ломов көшесінде «Mitsubishi» автокөлігін басқарған. Полиция қызметкерлерімен әңгімелесу барысында жүргізушіден алкогольдің өткір иісі сезілген. Медициналық куәландыру нәтижесінде оның мас екені расталды.

Тағы бір оқиға М. Жүсіп көшесінде орын алды. ВАЗ автокөлігінің жүргізушісі алкоголь иісі сезілмегеніне қарамастан, өзін дұрыс ұстамады. Медициналық тексеріс оның есірткіге мас болғанын анықтады.

Н.Назарбаев даңғылында «Hyundai Elantra» автокөлігінің жүргізушісі мас күйінде ұсталды. Сонымен қатар, ол көлік жүргізу куәлігінсіз болған.

Барлық құқық бұзушылардың ісі сотқа жіберіліп, көліктер мамандандырылған тұраққа қойылды.

Полицияның мәліметінше, жыл басынан бері мас күйінде көлік басқарудың 93 фактісі анықталған. Құқық бұзушылар заңнамада көрсетілген жазаларға тартылды.