Тексеру барысында атқарушылық құжаттама мен жұмыс орындарындағы тәртіп бойынша бұзушылықтар анықталды, деп хабарлайды @Pavlodarnews.kz тілшісі.

«AMANAT» партиясының облыстық филиалы баспасөз қызметінің мәліметінше, депутаттар қазіргі уақытта күрделі жөндеулер жүргізіліп жатқан бірқатар әлеуметтік маңызы бар денсаулық сақтау нысандарын аралады.  

Облыстық хосписте ғимараттағы барлық терезелерді ауыстыра отырып, жылыту, желдету, сумен жабдықтау, кәріз, жертөле үй-жайларын күрделі жөндеу жұмыстары басталды. Мердігерлер нысанды ағымдағы жылдың шілдесіне дейін толық аяқтауды жоспарлап отыр.  

Тексеру барысында мониторингтік топ мүшелері атқарушылық құжаттаманың дұрыс толтырылмауына назар аударды (жұмыстарды жүргізу журналы, жұмыстардың жалпы журналы, авторлық журнал, қауіпсіздік техникасының құжаттамасы, сертификаттау және тағы басқалары).  

– Жұмыс қажетті құжаттарды толтырудан басталуы керек. Бұл объектідегі жұмыстардың орындалу пайызын салыстырып, кесте құрып, сауатты есеп беру үшін қажет. Бұл жай ғана қыңырлық емес, тиісті талап құрылыс кодексінің нормативтік ережелерінде жазылған, – деп атап өтті облыстық мәслихат депутаты Гүлмира Нұрханова.  

Бұдан басқа, депутат Асылбек Туғанбай нысанда құрылыс қоқыстарының көп жиналуына назар аударды.  

– Біз бұл құрылыс алаңы екенін түсінеміз және мұнда құрылысшылар жұмыс істейді, бірақ соған қарамастан жұмыс орындарын таза ұстау керек. Қоқыс кедергілер тудыруы мүмкін, сонымен қатар дайын бөлмелерді зақымдауы мүмкін, – деп атап өтті ол.

Облыстық психикалық денсаулық орталығында партиялықтар балалар бөлімшесінің ғимаратын күрделі жөндеу барысымен танысты. Жақында мұнда жұмыс басталды және мердігерлер оң динамиканы көрсетті. Құрылысшылар осы жылдың шілде айының соңына дейін нысанды күрделі жөндеуді аяқтауға уәде береді.  

Көшпелі мониторинг қорытындысы бойынша топ мүшелері ұсыныстар берді. Жол картасы объектілерінің мониторингі бойынша жұмыс тұрақты негізде жалғастырылатын болады.