Биыл ғана облыста 12 мыңнан астам бала табыс көзімен қамтылды, деп хабарлайды @Pavlodarnews.kz тілшісі.

Павлодарда мектеп оқушыларын еңбекке тарту тәжірибесін кеңейту және жасөспірімдерге мектеп қабырғасында алғашқы жұмыс тәжірибесін алуға мүмкіндік беру мәселесі қарастырылуда. Бұл туралы қоғам белсендісі, партия және мемлекеттік қызмет ардагері Владимир Берковский айтты.

Оның пікірінше, балаларды еңбекке ерте жастан баулу маңызды. Биыл Павлодар облысында 12 мыңнан астам жасөспірім еңбек орындарында жұмыс істеген. Владимир Берковскийдің айтуынша, еңбек бағдарламаларына қатысушылардың орташа айлық табысы шамамен 150 мың теңгені құраған. Табыс атқарылатын жұмыс түріне қарай өзгереді.

- Қазіргі таңда еңбек бағдарламаларына негізінен 9–10 сынып оқушылары қатысады. Ал 14 жастағы, 7–8 сыныпта оқитын балаларды жұмысқа тартуда ата-аналардың ұстанымы белгілі бір қиындық туғызады. Кейбір ата-аналар балаларын еңбек ұжымына жіберуге дайын емес. Бұл мәселені шешудің бір жолы Павлодардағы №9 және №22 мектептерде тәжірибе ретінде іске асырылды. Білім беру ұйымдарында бұрын көп қолданылмаған тігін жабдықтарын пайдалана отырып, шағын тігін цехтары жұмысын бастады, - дейді жастарды жұмыспен қамту бойынша облыстың бас менторы.

Оқушылар шебердің бақылауымен қарапайым тапсырыстарды орындайды. Владимир Берковскийдің айтуынша, тәжірибесі аз оқушылардың өзі бірнеше сағат ішінде белгілі бір көлемдегі өнім дайындап, еңбегіне ақы ала алады. Алдағы уақытта мектеп шеберханаларын өнеркәсіп кәсіпорындарымен байланыстыру ұсынылып отыр. Кәсіпорындар мектептерге қарапайым өндірістік тапсырыстар беріп, дайын өнімді қабылдап, оның ақысын төлей алады.

Владимир Берковскийдің айтуынша, мұндай жүйе 7–8 сынып оқушыларын еңбекке көбірек тартуға мүмкіндік береді. Мұндағы негізгі мақсат – жасөспірімге нақты мамандық таңдату емес, оның алғашқы еңбек тәжірибесін қалыптастыру, жауапкершілікке және ұжымда жұмыс істеуге үйрету.