Облыс орталығында VI жастар ойындары аясында таеквондо жарыстары өтуде, деп хабарлайды @Pavlodarnews.kz тілшісі. 

Жарысқа 16 облыстан 270 спортшы қатысуда. 5-9 қыркүйек аралығында Павлодарда Қазақстан Республикасының VI жастар ойындары бағдарламасы аясында таеквондодан республикалық жарыстар өтіп жатыр. Павлодар облысының намысын 20 спортшы – 10 ұл және 10 қыз қорғауда.

– Соңғы Қазақстан чемпионатында павлодарлық спортшылар алтын медальға қол жеткізді. Азия чемпионатында да жақсы нәтижелер көрсетті. Сондықтан республикалық деңгейдегі жарысты осы қалада өткізу туралы шешім қабылданды, – деді Қазақстан таеквондо федерациясының спорт жөніндегі вице-президенті Сұлтан Қасымов.

Оның айтуынша, алдағы жылдары да Павлодар облысы жасөспірім спортшылардың орталығына айналуы мүмкін.

Жарыстың бас төрешісі, халықаралық дәрежедегі маман Даурен Алдабаевтың сөзінше, бұл додада еліміздің үздік төрешілері жұмыс істеп жатыр. 

– Барлығы 20 төреші: 10 халықаралық және 10 ұлттық дәрежедегі маман. Әр облыстан бір-бір төреші шақырылды. Жарыс әділ әрі жоғары деңгейде өтуде, – деді Даурен Алдабаев.

Жарыс төрт күнге жоспарланған. Әрбір спортшы өз салмағында 1/16 финалдан бастап финалға дейін бақ сынайды. Чемпион атану үшін кемінде төрт кездесу өткізу керек. 

Қыздар 10 келі салмақ дәрежесінде 42 келі салмақтан бастап +68 келі салмаққа дейін,  ұлдар 10 келі салмақ дәрежесінде 45 келі салмақтан бастап +78 келі салмаққа дейін сынға түсуде.

Жекпе-жектер доянг үстінде өтеді, әрқайсысы үш раундтан тұрады.

– Бұл жарысқа үш ай дайындалдым. Әр күні екі мәрте жаттығу өткіздік. Ертең доянгта бар күшімді саламын, – деді 55 келі  салмаққа жарысатын Алматыдан келген спортшы Мадияр Рахымбаев.

Және де осы жарысқа Павлодарлық спортшыларда қатысуда. Оның ішінде 78 келі салмаққа жарысатын, Қазақстанның жеті дүркін чемпионы, павлодарлық Егор Шаптефрац бар.

– Таеквондомен төрт жасымнан бері айналысамын. Бұл спортта мен 11 жыл жүрмін. Азия чемпионатында тәжірибе жинақтадым. Енді Павлодар төрінде жеңіс үшін күресемін, – деді жас спортшы. 

Павлодар облыстық дене шынықтыру және спорт басқармасының басшысы Азамат Имашев жарыстың ашылу салтанатында сөз сөйлеп, спортшыларға сәттілік тіледі.

– Таеквондо елімізде кең тараған олимпиадалық спорт түрі. Қазақстандық спортшылар әлемдік деңгейде жүлде алып жүр. Павлодар облысы бұл спорттың дамуына өз үлесін қосып келеді. Жарыс адал әрі әділ өтсін, – деп, қатысушыларға сәттілік тіледі.

Жарыстың жеңімпаздары мен жүлдегерлері медальдар және грамоталармен марапатталады. Ақшалай сыйақы қарастырылмағанымен, турнирдің маңызы жоғары. Өйткені бұл жарыстың қорытындысы әр облыстың спорттық рейтингінде есептеледі.

Павлодар төрінде өтіп жатқан VI жастар ойындары – жас спортшылар үшін үлкен мектеп әрі тәжірибе алаңы. Жарыстың қорытындысы сегізінші қыркүйек күні белгілі болып, үздік командалар анықталады.