Бұл аймақтар арасындағы ынтымақтастықтың жаңа бағыттарын кеңейтеді, деп хабарлайды @Pavlodarnews.kz тілшісі.

Қарағанды облысының «Достық үйінде» Қазақстан халқы Ассамблеясының 30 жылдығына арналған «Павлодар – Қарағанды: тәжірибе алмасу» атты өңіраралық диалог алаңы өтті. Іс-шараны республикалық «Қоғамдық келісім» ұйымдастырды.

Алаң екі облыстың мамандары мен сарапшыларын, этномәдени бірлестіктер мен ҚХА қоғамдық құрылымдарының өкілдерін біріктірді. Қатысушылар бірлескен жұмыстың негізгі бағыттарын, қоғамдық бастамаларды іске асырудың заманауи тәсілдерін талқылап, өңірлік табысты тәжірибелерімен бөлісті. Әсіресе павлодарлық жобалар мен қарағандылық «Достық үйінің» сараптамалық бастамалары үлкен қызығушылық тудырды.

Қарағанды спикерлері – өңірлік ішкі саясат басқармасы басшысының орынбасары Татьяна Гапонова, облыстық мәслихат және Қарағанды ҚХА төрағасының орынбасары Игорь Жабяк, облыстық еврей орталығының жетекшісі Вилен Молотов-Лучанский – павлодарлық «Достық үйінің» қоғамдық келісімді нығайтудағы озық тәжірибесінің маңыздылығын атап өтті.

Павлодар «Достық үйінің» директоры Нүрия Кубенова бұл сапардың өңіраралық кездесулер сериясын жалғастыратынын түсіндірді: бұған дейін павлодарлық делегация Семейдегі әріптестерінің жұмысымен танысып, конструктивті диалог өткізген.

Павлодар делегациясы Қарағандының этномәдени бірлестіктерінің қызметімен танысты. Қатысушылар «Атриум» үлкен залына, «Шабыт» көрме алаңына, халық шығармашылығы залы мен «Күй-керуен» орталығына барды. Сондай-ақ этномәдени орталықтардың офисіне ерекше назар аударылды: мұнда 24 бірлестік пен ҚХА-ның жеті қоғамдық құрылымы жұмыс істейді. Олардың қызметі мәдениетаралық өзара іс-қимылды нығайтуға бағытталған.

Қарағандының еврей мәдени орталығы, чечен-ингуш «Вайнах» бірлестігі және «Дағыстан» ұлттық мәдени орталығының жарқын өнер көрсетулері ерекше әсер қалдырды. Қатысушылардың пікірінше, мұндай шаралар бірлескен жұмыс мүмкіндіктерін кеңейтіп, қауымдастықтар арасындағы өзара түсіністі тереңдетеді.

Кездесу қорытындысы бойынша тараптар жаңа ынтымақтастық бағыттарын айқындап, тәжірибе алмасуды және Қазақстан халқы Ассамблеясын дамытуға бағытталған бірлескен жобаларды тұрақты жүргізуге уағдаласты.