Павлодар облысының әкімі Асайын Байханов пен Павлодар қаласының әкімі Хасар Хабылбеков қала тұрғындарына құттықтау және ізгі тілектерін арнады, деп хабарлайды @Pavlodarnews.kz тілшісі.

Әкімдер атап өткендей, Павлодар — жүрекке жақын, жанға ыстық қасиетті мекен. Бұл – әрқайсысының балалық шақ естелігі, өмірдің мәні мен мағынасы тоғысқан туған шаһары.

– Бүгінде ерке Ертіс жағасындағы көрікті қаламызда 370 мыңнан астам тұрғын тату-тәтті өмір сүріп жатыр. Бәрімізді туған жерге деген сүйіспеншілік пен оны көркейтуге деген ұмтылыс біріктіреді.

Бүгінде Павлодар - серпінді дамып келе жатқан, заманауи, келбеті жаңарып жатқан қала. Көшелер абаттандырылып, жаңа нысандар бой көтеріп, инвестициялық жобалар сәтті жүзеге асуда. Бұл жетістіктердің барлығы – сіздердің игі еңбектеріңіздің арқасы, – делінген құттықтауда.

Асайын Байханов пен Хасар Хабылбеков әрбір павлодарлыққа денсаулық, бейбітшілік, бақыт пен бақ-береке тіледі.