Тележоба қатысушылары әртүрлі өзекті тақырыптарды талқылап, олардың шешу жолдарын ұсынды, деп хабарлайды @Pavlodarnews.kz тілшісі.

Облыстық білім беру басқармасының баспасөз орталығының мәліметінше, Талдықорған қаласында «Ділмар» республикалық пікірсайыс тележобасы өтті. Павлодар облысынан М. Жүсіп атындағы мектептің 10-сынып оқушыларынан құралған Қайыр Шектібай мен Арнұр Абайдан тұратын команда қатысты.

– Жас пікірсайысшылар қалалық және облыстық пікірсайыс турнирлерінің бірнеше дүркін жүлдегерлері болып табылады. Іріктеу кезеңінде біздің команда Талдықорған қаласының командасымен ойнады, – деді баспасөз орталығы.

Жеребе салу нәтижесінде павлодарлық пікірсайысшылар «Жасанды интеллект мектеп бағдарламасына пән ретінде енгізілуі керек» деген тақырыпты қорғады. Пікірталаста негізгі аргументтер ретінде рационализация, уақытты үнемдеу, алалаушылықты жою және қайталанатын тапсырмаларды автоматтандыру таңдалды.

Зияткерлік сайыс қорытындысы бойынша Қайыр Шектібай «Үздік сарапшы» номинациясымен марапатталды, ал жетекшісі Аян Күзембаев Жетісу облысы білім беру басқармасының Құрмет грамотасымен марапатталды.

Сондай-ақ, павлодарлық пікірсайысшылар үшін Талдықорған қаласының №9 мектебіне мәдени-демалыс экскурсиясы ұйымдастырылды.