Павлодарлық «Майдан жолы» іздестіру жасағына Ұлы Отан соғысына қатысқан қызыләскер Иван Петрович Шейкиннің туыстары хабарласты, деп хабарлайды @Pavlodarnews.kz тілшісі.

Иван Шейкин 1910 жылы бұрынғы Семей облысы, Мақаншы ауданында дүниеге келген. 1941 жылдың 20 қыркүйегінде әскерге шақырылып, 1942 жылдың сәуір айында хабар-ошарсыз кеткен.

Іздестіру жасағының командирі Александр Шитовтың айтуынша, жауынгердің ұрпақтары Қазақстанда, Ресейде және Германияда тұрады. Алғаш болып байланысқа шыққан – Алматы қаласының тұрғыны Алла Шейкина. Ол Иван Петровичтің немересінің жұбайы екен.

– Иван Петровичтің жеті баласы болған. Бүгінде оның әулеті бірнеше елге таралған. Туыстары фотосуреттер мен қосымша деректер жолдады, – дейді Александр Шитов.

Айта кетейік, 2021 жылы ресейлік «Пирамида» іздестіру жасағы Новгород облысында қаза тапқан сарбаздардың сүйектерін қазып алу жұмыстарын бастаған. Сол кезде 52 жауынгердің сүйегі табылып, алты медальон оқылған. Кейін нысандардың жақын орналасуына байланысты жұмыстар уақытша тоқтатылған.

2026 жылы қазба жұмыстары қайта жанданып, Холм қаласындағы учаскеде тағы 28 жауынгердің сүйегі табылды. Барлығы тоғыз медальон анықталған: үшеуі оқылып, бесеуі сараптамаға жіберілген, біреуі бос болып шыққан.

Табылғандардың ішінде қазақстандық жауынгерлер де бар. Олардың бірі – Иван Шейкин. Сондай-ақ Семей өңірінен шыққан сержант Федор Бурнашовтың да есімі анықталған.

Іздестірушілердің мәліметінше, сарбазды салтанатты жерлеу рәсімі 2026 жылғы 7 мамырда Новгород облысы Холм округіне қарасты Первомайский кентінде өтеді.

– Іздестірушілердің еңбегі – бұл тек есімдерді қайтару емес, тұтас тағдырларды жаңғырту. Әрбір табылған жауынгер – халық жадының бір бөлшегі, – дейді Александр Шитов.

Іздеу жұмыстары жалғасуда.