Мерейтойлық жетістік музыкалық колледждер мен мамандандырылған мектеп оқушылары арасындағы республикалық кіші олимпиададағы жеңіспен толықты, деп хабарлайды @Pavlodarnews.kz тілшісі.

Павлодар музыкалық колледжі баспасөз қызметінің хабарлауынша, студент Айзере Айкенова шығармашылық жолындағы маңызды белеске жетті.

– Байқау Алматы қаласында Қазақстанның барлық өңірінен келген ең үздік жас музыканттардың басын қосты және елдегі ең талапшыл шығармашылық сайыстардың бірі саналады, – дейді білім беру мекемесінің баспасөз қызметі. – Айзере өзінің орындаушылық мәнерін қалыптастырып, дәстүрлі аспапты терең түсіне білді. Оның орындауындағы қобыз жай ғана музыкалық аспап емес, ұлттық мәдениеттің үнін жеткізетін ерекше құралға айналады.

Төрт жылдық оқу барысында оның есімі бірнеше рет жеңімпаз ретінде аталып келсе, бұл жолғы жеңіс кәсіби шеберліктің тұрақты өсуін айқындаған символдық жетістік болды.

Айзере Айкенова – орындаушылық өнердің жоғары деңгейіне ұмтылатын, өз ісіне адал, терең ойлы әрі талапшыл қазақстандық музыканттардың жаңа буынының өкілі.