Ол ұрпақтарына өсиет айтты, деп хабарлайды @Pavlodarnews.kz тілшісі.

Жастар бастамаларын дамыту орталығында жас ұрпақты болашақтың сын-тегеуріндеріне дайындау үшін білім беру саласындағы инновацияларға және технологияларды, атап айтқанда жасанды интеллектті қолдануға арналған «Digital Future: білім беру және технологиялар» форумының жұмысы басталды. Іс-шара цифрлық оқытуды дамытудың негізгі бағыттарын талқылау үшін білім беру және технологиялар саласындағы жетекші сарапшыларды, IT-индустрия өкілдерін, психологтар мен мұғалімдерді біріктірді.

Жастар бастамаларын дамыту орталығының директоры Ризат Рахымжановтың айтуынша, Astana Hub халықаралық технопаркінің спикерлері, IT-компаниялардың басшылары қатысушыларға тәжірибелерімен бөлісіп, психологтар заманауи технологиялардың балаларға әсері туралы әңгімелейді.

Облыстық ақпарат және қоғамдық келісім басқармасы басшысының орынбасары Ноян Шоманов цифрлық сауаттылықты меңгерудің және болашақ кадрларды даярлаудың маңыздылығын атап өтті. Тақырыпты ақпараттық технологиялар орталығының басшысы Елнұр Өтебаев жалғастырды.

- Біздің міндетіміз – бірінші кезекте техникалық салада бәсекеге қабілетті болашақ мамандарды даярлау. Еліміздің дамуы үшін бізге жоғары білікті кадрлар қажет, оның бәрі мектептен басталады. Мысалы, Astana Hub-та біздің бес мұғалім оқиды, олар болашақта 10-11 сынып оқушыларын оқытады, - деді Елнұр Өтебаев.

Ол сондай-ақ басқарма мектептердің техникалық жабдықталуын жақсартуға, интернет жылдамдығын арттыруға, мектептерді жөндеуге алдағы уақытта да күш салатынын атап өтті. 

Одан әрі форумға қатысушыларға Қазақ КСР және КСРО Ғылым академияларының академигі, Қазақ КСР Ғылым Академиясының тұңғыш президенті Қаныш Сәтбаев экраннан қарап сөйледі. Жасанды интеллект көмегімен жасалған бейнетаспа арқылы атақты ғалым біздің таңғажайып уақытта өмір сүріп жатқанымызды атап өтті.

- Сіз қазір көріп отырған цифрлық революция одан да терең трансформацияны білдіреді. Бұл жай ғана жаңа құралдар мен құрылғылар емес, бұл жаңа парадигма, ақпарат пен жасанды интеллект деректеріне негізделген әлеммен өзара әрекеттесудің жаңа тәсілі. Оқушыларыңызға тәлімгер болуды, пайда әлеміне бағыттаушы болуды үйреніңіз және өзгерістерден қорықпауды үйретіңіз. Жаңа дүниелерді ашуға шабыт беріңіз, - деді Қаныш Сәтбаев экраннан.

Одан соң психология ғылымдарының докторы Құралай Алина сөз алды. Ол цифрлық технологиялардың әсері туралы егжей-тегжейлі ақпарат жеткізуге тырысты. Құралай Алина технологияны қолдану мен оқушылардың психикалық денсаулығы арасындағы тепе-теңдікті сақтау бойынша нақты ұсыныстар айтты.

«Digital Future: Білім және технология» форумы кешке дейін жалғасады.