Олар классикалық шығармалар орындады, деп хабарлайды @Pavlodarnews.kz.

Алматы қаласында ҚР Мәдениет және ақпарат министрлігінің қолдауымен қобыз және туыстас аспаптарда орындаушылардың «Qobyz Amanat» халықаралық чемпионаты өтті.

Сайысқа Павлодар қаласының Құрманғазы атындағы балалар музыка мектебінің және Кенжекөл құрылымдық бөлімшесінің мектебінің жас қобызшылары, музыкалық колледж - дарынды балаларға арналған мектеп интернатының кешені, сондай-ақ, қалалық музыкалық колледжінің студенттері қатысты.

Музыкалық доданың мақсаты – қобыз және қобызға туыстас шекті-ысқылы фольклорлық аспаптарды насихаттау, шекті-ысқылы фольклорлық орындаушылар, оқу орындары мен түрлі елдердің музыкалық мекемелері арасындағы музыкалық іскерлік достықты нығайту, жас музыканттармен ағартушылық жұмыс жүргізу, қобыз музыкасын жарнамалау және дамыту, қазақ музыкасының бай мұрасымен таныстыру, фольклорлық музыка мен аспаптарды жаһандық деңгейде насихаттау.

– Бұл чемпионат ұлттық музыкалық дәстүрлерді дәріптеп, жас таланттарды қолдауда маңызды орын алды. «Qobyz Amanat» чемпионаты қылқобыз өнерінің болашақ дамуына серпін беріп, әлемдік сахнада қазақ халқының мәдени мұрасын кеңінен таныстыруға үлкен үлес қосты. Тағы бір ерекшелігі – классикалық шығармалар орындалып, Қазақстан композиторларының шығармалары, қобызға өңделген күйлер болды, – дейді қобыз сыныбының оқытушысы Үміткүл Жұмашова.

Чемпионаттың қорытындысы бойынша қалалық музыкалық колледждің студенттері чемпионаттың жеңімпаздары атанды. Бірінші орынды Аиниса Латыпова иеленсе, екінші орын Нұрай Қоңратбаеваға бұйырды.

Құрманғазы атындағы балалар музыка мектебінің және Кенжекөл құрылымдық бөлімшесінің мектебінің жас қобызшылары, Үміткүл Жұмашованың оқушылары Тоғжан Оралханова – I орын, Шағала Ержанболот – II номинациядан да I орын, Айша Жанбосынова – II орын, Әкерке Қазкенова – II орын, Мөлдір Мусина–II орын, Іңжу Айпова – III орынға ие болды. 

Музыкалық колледж - дарынды балаларға арналған мектеп-интернат кешенінің оқушылары Дария Даирова – I орын, Аида Тоендыкова –II орын, Айзада Наурызбай – III орынға қол жеткізді. 

 «Qobyz Amanat»  халықаралық чемпионаты «Шипалы қобыз» атты үлкен шоу-концертімен аяқталды. Концерттің солисі – Қазақстанның рекордтар кітабына енген көрнекті қобызшы, халықаралық байқаулардың лауреаты және LAYLA-QOBYZ ансамблінің жетекшісі Ләйлә Тәжібаева.