Павлодар полициясы Мемлекет басшысының «Цифрландыру – Қазақстан дамуының ажырамас құрамдас бөлігі» Жолдауын іске асыру бойынша жұмыс жүргізуде, деп хабарлайды  @Pavlodarnews.kz тілшісі. 

Азаматтардың хабарламаларын қабылдаудың көп арналы процесі ішкі істер органдарының бірыңғай терезесінде әртүрлі байланыс арналары арқылы халықпен өзара әрекеттесуге мүмкіндік береді. Мысалы, жол-көлік ережесін бұзу, жол-көлік оқиғасы, отбасылық жанжал, тұрмыстық зорлық-зомбылық, бұзақылық, төбелес, тыныштық режимін бұзу, қоғамдық орындарда мас күйінде жүру сияқты бұзушылықтарға қатысты хабарламаларды операторға аудио-бейне қоңырау арқылы жіберуге болады. Бұл ретте қоңырау шалушының орналасқан жері автоматты түрде анықталады. Нәтижесінде оператор не болып жатқанын көріп, шұғыл әрекет ету шараларын қолдана алады.

– Бүгінгі таңда «Police 102» қосымшасы арқылы 65 қоңырау мен хабарлама түскен. Олар бойынша полиция қызметкерлері дереу шаралар қабылдады, – деп хабарлады департаментте. 

Полиция AppStore және PlayMarket дүкендерінде тегін жүктеп алуға болатын «102» мобильді қосымшасы арқылы азаматтар жеке деректерге сәйкес тіркелетінін және оларды қолжетімді тәсілдермен (электрондық пошта, телефон нөмірі) растайтынын еске салады. Осыдан кейін жедел басқару орталығының операторына бейне және аудио қоңыраулар шалуға, сондай-ақ полицияға шағымдар мен өтініштер беруге болады.