Павлодардағы Д.П. Багаев музейі 19 наурыз күні сағат 15:00-де «Наурыз бояулары» атты фотокөрмеге шақырады, деп хабарлайды @Pavlodarnews.kz тілшісі.

Фотограф Айгүл Төлегенованың мақсаты – қазақ халқының ғасырлар бойғы дәстүрі мен қазіргі заманғы әйел эстетикасының байланысын Наурыз мерекесінің көктемгі жаңару атмосферасы арқылы көрсету.

– Көрме көркем портреттер арқылы қазақ костюмының сұлулығы мен терең символикасын еске салады, әйел бейнесінің Қазақстанның шексіз даласы мен сакралды киіз үйімен үйлесімін көрсетеді. Сонымен қатар, әйелдің өмір мен жылудың сақтаушысы ретіндегі мәртебесін айқындайды. Біз этностильдің музейлік экспонат емес, өзекті және фотогеникалық мәдениет екенін көрсетуге тырысамыз. Бұл мәдениет бүгінгі жастар үшін де қызықты, – дейді ұйымдастырушылар.

Көрмеде 50 фотожұмыс ұсынылған, әрбірі ұлттық дәстүр мен заманауи өнерді үйлестіре көрсетеді.