Андрей Виденeeв 60 жасқа толды. Алайда мерейтой оның тоқтап қалуына себеп емес, деп хабарлайды @Pavlodarnews.kz тілшісі.

Дүйсенбіде ол тағы да оқуға барады. Бұл жолы алтыншы разряд алу үшін. Ал зауытта жаңа жабдықты меңгеріп, жас маманға өз тәжірибесін үйретіп жүр. Павлодар машина жасау зауытының ERG Service кәсіпорнында бақылау-өлшеу аспаптары мен автоматикасын реттеуші болып жұмыс істейтін Андрей Виденeeвтің бұл кәсіпорында еңбек етіп келе жатқанына 16 жыл болды. Осы уақыт ішінде оның мамандығы да айтарлықтай өзгерді. Еңбек жолын дәнекерлеу жабдықтарынан бастаған маманның жауапкершілік аймағына кейін термиялық машиналар қосылды. Ал бүгінде ол сандық бағдарламамен басқарылатын станоктармен де жұмыс істейді.

— Үнемі оқып, үйреніп отыру керек. Қазір алтыншы разрядқа оқуға бара жатырмын, — дейді ол мұны жұмыс аптасының қалыпты бір бөлігі секілді сабырлы түрде айтып.

Андрей Виденeeвтің кәсіби жолы өткен ғасырда басталған. Мамандығы бойынша ол приборист, автоматика саласында арнайы даярлығы бар. Зауытта жұмыс істеп, аспаптарды жөндеумен айналысқан.

Содан кейін әскер қатарына шақырылды. Нақтырақ айтқанда, Солтүстік флотта бірнеше жыл қызмет етті. 1985 жылы Андрей Виденeeв Севастопольге, суасты жүзу бойынша оқу отрядына шақырылды. Дайындықтан кейін Солтүстік флотқа аттанып, стратегиялық мақсаттағы атом сүңгуір қайығында қызмет етті. Акустик болды, үш автономды жорыққа қатысты. Әскери қызмет оған басқа жерде алу қиын тәжірибе берді.

— Сүңгуір қайықта көп жыл қызмет еттім. Кейін мичмандар мектебін бітірдім. Үш автономды жорыққа қатыстым, — деп еске алады Андрей.

Алайда әскери қызметті жалғастыруға мүмкіндік болмады. Бір күні ол есту қабілетін жарақаттап алды. Акустик үшін бұл аса маңызды мәселе еді. Кейін өмірі де өзгерді, бұрынғы жоспарларының күші жойылды. Андрей туған Қазақстанына оралды. Әскери қызметтен кейін жаңа жағдайда өз орнын табуға тура келді. Әртүрлі жерде жұмыс істеп, бірнеше рет қызмет ауыстырды. Ақырында Павлодар машина жасау зауытына келді.

Зауытты таңдауының себептерінің бірі – үйіне жақын орналасуы, электроникамен жұмыс істеу мүмкіндігі және еңбек жағдайларының лайықтылығы еді. 16 жыл ішінде кәсіпорын ол үшін жай ғана жұмыс орны болып қалған жоқ. Мұнда ол үнемі өзгеріп отыратын техниканы меңгеріп келеді. Ал кейбір жабдықтар мүлде басқа тәсілді талап етеді.

Кейбір станоктарды, дейді Андрей, техникалық құжаттама арқылы өз бетінше зерттеуге тура келеді: сызбаларды іздеу, схемаларды түсіну, қажет болса мамандардан кеңес алу. Жаңа жабдықпен жұмыс та осыны талап етеді. Жаңа міндет пайда болса, қайтадан үйрену керек.

Реттеушінің жұмыс күні жоспарлы жиыннан басталады. Одан кейін жабдықтарды жөндеуге қатысты өтінімдер түседі. Бірақ Андрей құрал-саймандарын қолға алмас бұрын станокта жұмыс істейтін адамдармен сөйлеседі. Оператор, дәнекерлеуші немесе басқа маман ақаудың қалай пайда болғанын егжей-тегжейлі айтуы керек: ақау қашан шықты, қандай қозғалыс кезінде байқалды, қандай жағдайда орын алды. Осыдан кейін диагностика басталады.

Алдымен сыртқы тексеру жүргізіледі: бір жері босап кеткен бе, күйіп кеткен немесе сынып қалған бөлшек бар ма. Егер сырт көзге көрінетін белгі болмаса, техникалық құжаттамаға жүгінеді. Бақылау нүктелері, кернеу, параметрлердің белгіленген көрсеткіштерге сәйкестігі тексеріледі.

Мұнда болжаммен жұмыс істеуге болмайды. Жабдықтың қалыпты жағдайда қалай жұмыс істеуі керектігін білу және ақау шыққан жерді біртіндеп анықтау қажет.

Сондықтан бұл мамандық үнемі білім жетілдіруді талап етеді. Жақында зауытқа жас маман келіп, Андрейге шәкірт болып бекітілді. Енді көп жылдық тәжірибесі бар маман кезінде өзі үйренген білімін кейінгі буынға беріп жүр.

Ол жас маманға платаларды тексеруді, өлшеу аспаптарымен жұмыс істеуді көрсетіп, электронды техниканың жұмыс істеу қағидаларын түсіндіреді. Мәселен, бірге геометрияны, монитордағы кадрлық жайманы, қоректендіру жүйесі мен пульсацияны талдайды.

Андрей Виденeeв жас маманға қатысты артық иллюзияға берілмейді. Бірақ ең бастысы – оның болашағы бар деп есептейді. Алдымен қарапайым тапсырмалардан бастайды. Кейін міндеттер біртіндеп күрделене түседі. Уақыт өте келе шәкірт өтінімдер бойынша өздігінен жұмыс істеп, ақауды анықтауды үйренуі тиіс.

Андрей үшін мұның бәрі қалыпты нәрсе. Енді өзі ондаған жыл бойы жинаған білімін келесі маманға беріп жатыр.

Бос уақытында Андрей кино көруі немесе түрлі ойындар ойнауы мүмкін. Арнайы әуестігі жоқ. Бірақ 16 жылдан бері жұмыс істеп келе жатқан кәсіпорында оның алдында әлі де жаңа міндеттер бар.

Бәлкім, Андрей Виденeeвтің мінезін де осыдан аңғаруға болатын шығар: өзі туралы көп айтып, даурығып жатпайды. Тек келесі жұмысты атқарады. Түсінеді. Тексереді. Үйренеді. Содан кейін өзінен кейін келген адамға мұны қалай жасау керектігін көрсетеді.

Жарнамалық материал