Балалар қауіпсіздігін арттыру мақсатында жол полициясымен бірлескен рейдтер жоспарланып отыр, деп хабарлайды @Pavlodarnews.kz тілшісі.

Облыстың бала құқықтары жөніндегі уәкілі Сәуле Шакенева прокуратураның аға көмекшісі Асхат Әтікеевпен бірге ресми статистика мен проблеманы шешу жолдарын қарастырды. Уәкіл балалардың жарақат алу фактілері бойынша қозғалған әкімшілік және қылмыстық істердің, сондай-ақ қауіпсіздік шараларының сақталмауына қатысты деректерді сұратты.

– 2025 жылдың алғашқы төрт айында облыста 6693 бала жарақат алды. Олардың ішінде жол-көлік оқиғаларынан 85, көшедегі жарақаттардан 2280, тұрмыстық жағдайлардан 2880 бала зардап шеккен. Сонымен қатар 65 улану және 141 күйік тіркелген. Жеті бала көз жұмды: төртеуі бір жасқа дейінгі асфиксиядан, біреуі өрттен, екеуі жол апатынан, – деп жазды Сәуле Шакенева өзінің Instagram парақшасында.

Жол-көлік оқиғалары бөлек назарды қажет етеді. Қысқа мерзім ішінде екі бала қайтыс болды, зардап шеккендер саны әлдеқайда көп. Уәкіл ата-аналардың балаларды арнайы автокреслосыз тасымалдауы, қауіпсіздік белдігін тақтырмауы және 12 жасқа толмаған балаларды алдыңғы орындыққа отырғызуы жиі кездесетінін атап өтті. Ол үшінші сынып оқушыларымен әңгімелесу барысында кейбір балалардың ата-аналары трассада алдыңғы орынға отырғызатынын мақтанышпен айтқанына алаңдаушылық білдірді.

Бұл мәселелер облыстық полиция департаментінің бастығы, генерал-майор Василий Склярмен де талқыланып, балаларды тасымалдау ережелерінің сақталуын бақылауға арналған рейдтер ұйымдастыру бастамасы көтерілді. Сәуле Шакеневаның айтуынша, мұндай шаралар балалардың қауіпсіздігін арттыруға және ата-аналардың жауапкершілігін күшейтуге бағытталған.