Қаскөйлер жасанды интеллект арқылы жоқ тауарлардың суреттерін жасап, оларды жалған сайттарда ұсынады, деп хабарлайды @Pavlodarnews.kz тілшісі.

Бас прокуратураның мәліметінше, Ұстаздар күні қарсаңында сыйлық іздеген азаматтарды алдауға бағытталған жаңа схема таралуда. Құқық қорғау органдары бұл туралы шетелдік дереккөздердегі ақпаратқа сүйене отырып ескертті.

Алаяқтар мессенджерлер мен басқа арналар арқылы мұғалімдерге арналған сыйлықтарды тиімді бағамен сатып алуды ұсынатын сайттарға сілтеме таратады. Мұндай парақшалар сыртқы көрінісі бойынша шынайы интернет-дүкендерге ұқсайды.

Схеманың ерекшелігі – жасанды интеллектіні пайдалану. Қаскөйлер ЖИ көмегімен шын мәнінде сатылымда жоқ тауарлардың суреттерін жасайды. Ал әлеуетті сатып алушымен сатушының орнына чат-бот сөйлесуі мүмкін.

– Мұндай сайттар шынайы дүкендерге ұқсас, бірақ төлем жасағаннан кейін сатып алушының ақшасыз да, сыйлықсыз да қалу тәуекелі бар, – деп ескертті Бас прокуратурада.

Мамандар күмәнді хабарламалардағы сілтемелерге өтпеуге және ондағы телефон нөмірлеріне хабарласпауға кеңес береді. Банк картасының CVV-кодын, PIN-кодты, парольді және SMS арқылы келген растау кодтарын ешкімге беруге болмайды.

Сондай-ақ сайт пен сатушының сенімділігіне көз жеткізбей алдын ала төлем жасамаған жөн. Тапсырыс туралы ақпаратты дүкеннің ресми сайты немесе қосымшасы арқылы өз бетінше тексеру ұсынылады.

Егер азамат карта деректерін беріп қойса немесе шотынан күмәнді ақша алынғанын байқаса, банкке дереу хабарласып, картаны бұғаттауы және полицияға жүгінуі қажет.