Этно-байқауға оннан астам ауыл қатысты, деп хабарлайды @Pavlodarnews.kz тілшісі.

Екібастұз қаласында достықтың, молшылық пен бірліктің жарқын мерекесіне айналған «Қымызмұрындық» этномәдени фестивалі кең көлемде аталып өтті. Мәдени мұраны дәріптеуге, қазақ халқының салт-дәстүрі мен әдет-ғұрпын насихаттауға, сондай-ақ қала мен ауыл арасындағы байланысты нығайтуға бағытталған бірегей шараға өңірдің барлық ауылдық округтері мен елді мекендерінің өкілдері қатысты.

Мерекелік этно-байқауға Ә.Марғұлан атындағы ауыл, Екібастұз ауылдық округі (Тай, Төртүй ауылдары), Қоянды, Зеленая Роща, Бесқауға ауылдары, Бәйет ауылдық округі (Атығай, Бәйет ауылдары), сондай-ақ Құлакөл, Ақкөл, Шиқылдақ, Сарықамыс және Құдайкөл ауылдары қатысты.

Әрбір қатысушы дәстүрлі қазақ ауылының атмосферасын барынша шынайы жаңғыртып, халық шығармашылығының бай мұрасын таныту үшін бар күш-жігерін салды.

— Біз үшін бұл фестиваль – өмір бойы айналысып келе жатқан ата кәсібімізді көпшілікке таныстыруға берілген үлкен мүмкіндік. Біз отбасымызда ұрпақтан-ұрпаққа жалғасып келе жатқан қымыздың дәстүрлі рецептін алып келдік. Оның әрбір бөлшегінің – ашытқысынан бастап, ағаш сабасына дейін – өзіндік маңызы бар. Қала тұрғындарына шипалы сусынның нағыз дала дәмін сезіндіргіміз келді, – деді қатысушылардың бірі.

Фестиваль ережесіне сәйкес, ауылдық округтер мен ауылдар байқаудың төрт негізгі шартын орындады. Қатысушылар ұлттық тағамдар мен сусындар көрмесін ұйымдастырып, қымыздың алуан түрінен, бауырсақ, құрт және ірімшіктен дәм таттырды. Сонымен қатар, халықтың дәстүрлі қолөнер бұйымдары мен ат әбзелдерінің бірегей көрмесін ұсынып, көшпелі дала өркениетінің ғасырлар бойы қалыптасқан дәстүрлерін дәріптеді.

Бұдан бөлек, қатысушылар үш жарқын музыкалық нөмірден тұратын шығармашылық таныстырылымын ұсынды. Бағдарламада халық әндері, домбырада шебер орындалған күйлер мен ұлттық билер қамтылды. Сондай-ақ әр ауыл өзінің ұлттық нақышта безендірілген көрме алаңын таныстырып, оның ерекшеліктерін мазмұнды түрде қорғады.

Мерекеге келген қонақтар шараның ауқымы мен ерекше этномәдени көрінісіне таңданыстарын жасырмады.

— Мұндағы атмосфера ерекше әсер қалдырды. Бір күнде бірнеше ғасыр бұрынғы кезеңге тап болғандай күй кештік. Әсіресе ат әбзелдерінің көрмесі таңғалдырды. Бұл – шеберлердің асқан талғамы мен зергерлік дәлдікті талап ететін өте нәзік жұмыс екені көрініп тұр. Әрине, музыка да ерекше әсерлі болды. Этноауылдың ортасында домбыраның жанды даусын есту – жүрекке жетеді. Ауылдарымыздың осы мәдениетті бастапқы қалпында сақтап қалғаны қуантады, – деді қала тұрғыны.

Фестиваль қорытындысы бойынша салтанатты марапаттау рәсімі өтті. Ұйымдастырушылар барлық қатысушылардың жоғары деңгейдегі дайындығын атап өтіп, ұлттық кодты сақтауға және жергілікті өнерді дамытуға қосқан елеулі үлесі үшін оларға дипломдар, Алғыс хаттар және қаржылай  сыйлықтар табыстады.