Полиция қызметкерлері автокөліктің техникалық жағдайын тексеріп, қауіпсіздік талаптарын сақтауға шақырады, деп хабарлайды @Pavlodarnews.kz тілшісі.

Күн суытып, қыс мезгілі жақындаған сайын жүргізушілер көліктерін күрделі жол жағдайларына алдын ала дайындауы қажет.  Қар жаууы, көктайғақ, ауа температурасының күрт төмендеуі және көріну деңгейінің нашарлауы жол-көлік оқиғаларының қаупін арттырады. Мұндай жағдайда көліктің техникалық жарамдылығы мен жүргізушінің мұқият болуы ерекше маңызды.

Полиция қызметкерлері қысқы маусым алдында мына талаптарға назар аударуды ұсынады:

– жазғы шиналарды қысқы дөңгелектерге уақтылы ауыстыру;

– шиналардың протекторының тереңдігі мен тозу деңгейін тексеру;

– тежегіш жүйесінің жарамдылығына көз жеткізу;

– аккумулятордың, жарық шамдары мен әйнек тазалағыштардың жұмысын тексеру;

– әйнек жуғышқа арналған қатпайтын сұйықтық құю;

– көлікте дәрі қобдишасы, өрт сөндіргіш және апаттық тоқтау белгісінің болуын қамтамасыз ету.

Сонымен қатар, қыс мезгілінде жүргізушілер жол және ауа райы жағдайына қарай қауіпсіз жылдамдықты таңдауы керек. Көліктер арасындағы арақашықтықты сақтап, күрт бұрылу мен шұғыл тежеуден аулақ болған жөн.

Полиция өкілдері автокөлікті қысқа алдын ала дайындау жол қозғалысына қатысушылардың қауіпсіздігін қамтамасыз етудің маңызды шарты екенін еске салады.