Барлығы 35 ересек адам және үш бала ем алған, деп хабарлайды @Pavlodarnews.kz. 

Облыстық денсаулық сақтау басқармасының мәліметінше, уланғандар инфекциялық стационарда орта есеппен бір апта жатты.  

– Барлығы анықталмаған бактериялық ішек инфекциясымен ауруханаға жатқызылды, – деп хабарлады ведомствода. – Зертханалық зерттеулерден кейін барлығына расталған сальмонеллез диагнозы қойылды. Олардың денсаулығы жақсарып, ауруханадан шығарылды. Тиісті ұсыныстар берілді. 

Естеріңізге сала кетейік, 7 маусымда Bellagio банкет залында қыз ұзатуға барған 20-дан астам адам өздерін нашар сезінді. 8 маусымда да сол мекемеде тағы бір мерейтой өтіп, бірнеше қонақ уланды. 

Санитарлық дәрігерлер сарқыт, су, азық-түлік, шикізат және шайындылардан сынама алды. Қызметкерлер дизентерия, сальмонеллез және стафилококк тасымалдаушыларына тексерілді. Жеті қызметкер медициналық тексеруден өтпеді, олар жұмыстан шеттетілді. Мекеменің қызметіне тыйым салу туралы қаулы шығарылды.