Әлеуметтік желілерде тараған ақпараттан кейін мамандар су сапасын тексеріп, тұрғындарға түсініктеме берді, деп хабарлайды @Pavlodarnews.kz тілшісі.

«Павлодар-Водоканал» ЖШС баспасөз қызметінің мәліметінше, әлеуметтік желілерде Ақсу қаласындағы Ертістің жылы ағысы маңында майлы дақтар пайда болғаны туралы ақпарат тарады.

– Осыған байланысты «Павлодар-Водоканал» ЖШС зертханасы ауыз суынан жедел сынама алып, зерттеу жүргізді. Нәтижесінде судың сапасы қолданыстағы санитарлық нормалар мен талаптарға толық сәйкес келетіні анықталды. Нормативтік көрсеткіштерден ешқандай ауытқу тіркелмеген, – делінген хабарламада.

Мамандардың айтуынша, тұрғындардың алаңдауына негіз жоқ, ауызсу тұтынуға қауіпсіз.

Сондай-ақ кәсіпорында су сапасына бақылау тәулік бойы үздіксіз жүргізілетіні айтылды. Аккредиттелген зертхана химиялық және бактериологиялық көрсеткіштер бойынша тұрақты мониторинг жасап, су тазарту, сүзу және залалсыздандыру жұмыстары жүйелі түрде орындалып келеді.