Оқиға бір күн бұрын болған, деп хабарлайды  Рavlodarnews.kz.

Облыстық жедел жәрдем станциясы баспасөз қызметінің мәліметінше, 103 қызметінің фельдшерлері 73 жастағы әйелді клиникалық өлім жағдайынан алып шықты. Қалалық автобустардың жолаушысының бірі кенеттен өзін нашар сезінген. Оған жақын маңдағы аялдамадан шығуға көмек көрсетіліп, жедел жәрдем шақырылған. Медициналық топ оқиға орнында 4 минуттан кейін болды. 

– Әйелдің анамнезінде жүректің ишемиялық ауруы және стенокардия болған, – дейді 103 облыстық станция бас дәрігерінің орынбасары Ольга Вербовая. – Біздің қызметкерлер көмекке келген кезде науқастың жүрегі тоқтап қалды. Сондықтан фельдшерлер дереу дефибрилляторды қолдана отырып, реанимациялық шараларға кірісті.

Дәрігерлер әйелді қалалық ауруханаға жеткізді.

Айта кетерлігі, зейнеткерді құтқарған бригаданың құрамына тек фельдшерлер кіреді. Олар 103 дәрігерлерімен қатар үздіксіз біліктілікті арттырудан өтеді, соның ішінде оқыту және реанимациялық шаралар алгоритмін қайталау. Соның нәтижесінде облыстық жедел жәрдем станциясында табысты реанимацияның жоғары көрсеткішіне қол жеткізілді. Жыл басынан бері Павлодар облысында 8 сәтті реанимация өткізілді, оның үшеуінде 103 қызметтің фельдшерлік бригадалары жұмыс істеді.