Мемлекет басшысы апаттық жағдайдың қайталанбауы тиіс екенін атап өтті, деп хабарлайды @Pavlodarnews.kz Ақордаға сілтеме жасап.

Президент Қасым-Жомарт Тоқаевтың төрағалығымен Астанада елдің әлеуметтік-экономикалық дамуы мәселелері бойынша кеңес өтуде. Мемлекет басшысы Павлодар облысы әкімінің есебін тыңдаған соң Екібастұз энергия торабын жаңғыртуға баса назар аударылатынын атап өтті.

– Үкімет пен әкімдік ГРЭС-1 бірінші энергоблогын уақтылы іске қосуды және екі жаңа ГРЭС-2 блогын салуды қамтамасыз етуі қажет. Бұл – еліміз үшін маңызы зор ауқымы жобалар, – деп атап өтті Қасым-Жомарт Тоқаев.

Ол Екібастұз ЖЭО-ны жаңғырту және келесі жылыту маусымына дайындық туралы да айтып өтті.

– Барлық жоспарлар толық көлемде әрі дәл уақытында жүзеге асырылуы тиіс. Былтырғы жағдайды қайталауға жол берілмейді, – деді Мемлекет басшысы.

Естеріңізге сала кетейік, өткен жылы Екібастұз жылу желілері мен ЖЭО-да болған үлкен апатқа байланысты қаланың бір бөлігі жылусыз қалған болатын.