Полицейлер 400 грамға жуық есірткі затын тәркіледі, деп хабарлайды @Pavlodarnews.kz.

Облыстық полиция департаменті баспасөз қызметінің мәліметінше, Telegram мессенджеріндегі «Көлеңкелі батыр» чат-ботына Екібастұз қаласының тұрғыны есірткі және психотроптық заттардың заңсыз айналымы саласында құқыққа қарсы қызметті жүзеге асыратыны туралы ақпарат келіп түсті. 

– Жедел-іздестіру іс-шараларын жүргізу нәтижесінде Павлодар облысы полиция департаментінің есірткі қылмысына қарсы іс-қимыл бөлімшелерінің қызметкерлері ер адамды тыйым салынған заттарды таратқаны үшін ұстады. Ол жедел уәкілдердің деректері бойынша тыйым салынған заттарды интернет-дүкен арқылы сату жөніндегі қылмыстық схемаға қатысқан. Оның міндеттеріне есірткінің көтерме партияларын алу, оларды орау және тарату кірді. Есірткіні тұтынушыларға географиялық координаттар мен фотосуреттер арқылы берген,– деді департаментте.  

35 жастағы ер адамды тінту кезінде полиция қызметкерлері кристалл тәрізді заттың екі үлкен пакетін тәркіледі. Сараптамада анықталғандай, онда синтетикадан жасалған 400 грамға жуық есірткі заттары болған, бұл аса ірі мөлшер болып саналады және екі мың бір реттік дозаға сәйкес келеді. Пәтерде, қаскүнемнің тұрғылықты жерінен электронды таразылар, электрлік таспалар мен магниттер табылды, олар оны қаптамалап орау кезінде қолданды. 

– Есірткі заттарын заңсыз дайындау, өңдеу, сақтау немесе өткізу фактісі бойынша сотқа дейінгі тергеу жүргізілуде, күдікті қамауда. Тергеу аясында азаматтардың құқыққа қайшы схемаға қатысы, сондай-ақ тыйым салынған заттың шығу тегі және оны іске асыру тетігі, оның ішінде интернет желісін пайдалана отырып белгіленеді, – деді Павлодар облысы ПД ЕҚҚІҚБ бастығы Тимур Қаржаубаев. 

Қазақстан Республикасы Конституциясының 77-бабы 3-тармағының 1-тармақшасына, Қазақстан Республикасы қылмыстық-процессуалдық кодексінің 19-бабы 1-бөлігіне сәйкес адам өзінің кінәсі соттың заңды күшіне енген үкімімен танылғанға дейін қылмыс жасағаны үшін кінәсіз деп есептеледі.