Жыл басынан бері облыста үш бала жол апатынан қаза тапты, деп хабарлайды @Pavlodarnews.kz тілшісі.

Бұдан бөлек, 11 адам әртүрлі ауыр деңгейде жарақаттар алды.

Бұл туралы полиция департаменті жергілікті полиция қызметі басқармасының бастығы Қуаныш Мұстафинов мәлім етті.

2 қыркүйек күні кешкі сағат алтыда Майқайың ауылынан Баянауылға қарай шығып келе жатқан «Audi-80» көлігінің жүргізушісі жеті жасар баланы қағып кеткен. Ол жолдың тыйым салынған бөлігінен өтіп бара жатқан.

–  Жарақат алған бала Екібастұз қалалық ауруханасына жатқызылып, сол жерде қайтыс болған, – деді спикер. –  Балалардың қатысуымен болған жол-көлік оқиғаларының өсуінің негізгі себептерінің бірі – жолдан белгіленбеген жерлерде өту.

Еске сала кетейік, биыл Ақсу мен Павлодар қалаларын байланыстыратын көпірде скутермен жүрген екі жасөспірім апатқа ұшырған. Өткен жылы жол апатынан үш бала қайтыс болды.