Полиция жүргізіп жатқан рейдтер барысында алкоголь заңнамасын бұзудың бірнеше дерегі әшкереленіп, материалдар сотқа жолданды, деп хабарлайды @Pavlodarnews.kz тілшісі. 

Облыстық полиция департаменті баспасөз қызметінің мәліметінше, жыл басынан бері алкогольге қарсы заңнаманы бұзудың 15 фактісі анықталды, оның ішінде 3-і тиісті лицензиясыз жүзеге асырылған.

Көптеген кәсіпкерлер ақшалай пайда табу үшін заңды бұзып, 21 жасқа толмаған адамдарға алкоголь сатуға тыйым салынғанын ұмытып кетеді.

«Этил спирті мен алкоголь өнімінің өндірісі мен айналымын мемлекеттік реттеу туралы» Қазақстан Республикасының Заңына сәйкес мейрамханалар, барлар мен кафелерді қоспағанда, алкогольді бөлшек саудада сатуға сағат 23:00-ден 8:00-ге дейін тыйым салынады.

– Мәселен, 10-желілік жол көшесінде сатушы 21 жасқа толмаған адамға алкоголь мен темекі өнімдерін сатқан. Ал, М. Жүсіп көшесіндегі дүкенде сағат 7:00-де, яғни белгіленген уақыттан тыс алкоголь сатылған. Барлық деректер бойынша құқық бұзушылар жауапкершілікке тартылды. Материалдар сотқа жіберілді, – делінген хабарламада.

Заңнама алкогольді сату ережелерін қатаң сақтауды талап етеді және бұл нормаларды бұзу ауыр зардаптарға әкелуі мүмкін. Жауапкершілікке тарту оқиғалары қоғамдағы қауіпсіздік пен тәртіпті қамтамасыз ету үшін рұқсат етілген сату уақытын сақтаудың маңыздылығын еске салады.

Еске сала кетейік, Павлодар ауданында сатушы жасөспірімге темекі сатып, әкімшілік жауапкершілікке тартылды. Сонымен қатар, тәртіпсіздікке барған жеткіншекке байланысты анасына айыппұл салынды.