Барлық жұмыстар құрылыс-монтаждау кестесіне сәйкес жүріп жатыр, деп хабарлайды @Pavlodarnews.kz тілшісі.

Қала әкімі Аян Бейсекин қалалық жылу-электр орталығындағы жөндеу жұмыстарының барысын тексерді. Бұған дейін ол соңғы екі қазандықтағы жұмыс қараша және желтоқсан айларында аяқталатынын хабарлаған болатын. 

– Қараша айының соңында 15-қазандықты іске қосуды жоспарлап отырмыз. 5-қазандықтағы барлық жұмыстар желтоқсан айында аяқталады, – деді Аян Бейсекин.

Қала басшысы мердігер ұйымдардың алдына барлық жұмысты тиімді және бекітілген мерзімде аяқтау міндетін қойды. Қазіргі таңда станцияда бес қазандық жұмыс істеп тұр, үш қазандық резервте. Жылыту маусымы әдеттегідей жалғасуда.

Сондай-ақ қала әкімі жылумен қамту жүйесінің жұмысына қатысты барлық мәселелер облыс әкімі Асайын Байхановтың және өзінің тұрақты бақылауында екенін атап өтті.