Көшеттер резерваттың өз тұқымбақтарында өсірілген екі жылдық отырғызу материалынан алынды, деп хабарлайды @Pavlodarnews.kz тілшісі.

Павлодар облысындағы «Ертіс орманы» мемлекеттік табиғи резерватының 16 орманшылығында күзгі орман отырғызу жұмыстары жүріп жатыр.

Биыл резерват ормандарына үш миллионнан астам жас қарағай көшеті отырғызылады. Бұл 600 гектардан астам аумақты қайта қалпына келтіруге мүмкіндік береді.

– Отырғызу жұмыстары механикаландырылған тәсілмен – МТЗ-82 тракторларының базасында СЛН-1 және МЛУ маркалы ағаш отырғызу машиналары арқылы жүзеге асырылуда. Көшеттер резерваттың өз тұқымбақтарында өсірілген екі жылдық отырғызу материалынан алынды, – деді резерватта.

Орманды қалпына келтіруге 200-ден астам жұмысшы, 45 орман отырғызу машинасы және 48 техника бірлігі жұмылдырылған.

Сонымен қатар, «Ертіс орманы» аумағындағы уақытша орман-тұқымдық учаскелерде қарағай бүрінің өнімділігіне бағалау жүргізілді. Зерттеу нәтижелері бойынша бір ағаштағы бүрдің орташа саны 170-220 дана, ал 1 гектардағы өнімділік 305-тен 410 килограмға дейін жетеді.

Бағалау Павлодар облысында орман шаруашылығын жүргізудің негізгі ережелеріне сәйкес жүргізілген. Алынған мәліметтер тұқым қорын дайындау, өнімділігі жоғары учаскелерді іріктеу және орманды сапалы қалпына келтіруді жоспарлауға мүмкіндік береді.

Мамандардың айтуынша, мұндай шаралар өңірдің қарағайлы ормандарын сақтау мен орман ресурстарын тиімді басқаруда маңызды рөл атқарады.