Кездесу ашық диалог форматында өтті, деп хабарлайды @Pavlodarnews.kz тілшісі.

Павлодар қаласында Есірткі қылмысына қарсы іс-қимыл басқармасының қызметкерлері ІІМ жанындағы Есірткі құқықбұзушылықтарының алдын алу жөніндегі республикалық кеңес мүшелерімен бірлесіп, студенттік жатақханаларда профилактикалық рейд өткізді.

Рейд барысында Боран есімді із кесуші ит те тартылды. Полицейлердің айтуынша, мұндай тексерістер жастардың қауіпсіздігін қамтамасыз ету мақсатында ұйымдастырылады. Өйткені ата-аналарынан жырақта тұратын студенттер түрлі азғыруларға ұрынуы мүмкін, бұл өз кезегінде заңмен мәселелерге немесе оңай табыс табуға деген ұмтылысқа алып келеді.

Тексеру Павлодар қаласындағы электроника және коммуникация жоғары колледжінің жатақханасында өтті. Оқу орны әкімшілігінің және студенттердің келісімімен жүргізілген рейд кезінде жастарға есірткі заттарын қолданудың салдары туралы түсіндірме жұмыстары жүргізіліп, ақпараттық парақшалар таратылды.

– Біздің мақсатымыз – студенттерге тыйым салынған заттардың қаншалықты қауіпті екенін түсіндіру және оларды есірткі бизнесіне тартылудан сақтау, – дейді есірткі қылмысына қарсы іс-қимыл басқармасының бөлім бастығы Ирина Тимиргалиева.

Оның айтуынша, қазіргі уақытта ведомство Үкімет бекіткен есірткіге және есірткі бизнесіне қарсы күрестің кешенді жоспарын іске асыруда. Бұл құжат полициямен қатар, басқа да мемлекеттік органдардың наркоманияның алдын алу және елдің генетикалық қорын сақтау бағытындағы шараларын қамтиды.

Кездесу ашық диалог форматында өтіп, студенттер өздерін қызықтырған сұрақтарын қойып, мамандардан нақты жауап алды. Рейд соңында жастарға есірткі заттарының адам ағзасына тигізетін зияны және заңсыз айналымға қатысудың салдары туралы тағы бір мәрте ескертілді.

Айта кетейік, мұндай профилактикалық іс-шаралар Павлодардағы оқу орындарының жатақханаларында тұрақты түрде өткізіліп келеді.