Көктемгі мұз – көзге берік көрінгенімен, аса қауіпті. ТЖД қызметкерлері рейдтер жүргізіп, тұрғындарды өз өмірін қатерге тікпеуге шақырады, деп хабарлайды @Pavlodarnews.kz тілшісі. 

Төтенше жағдайлар департаментінің қызметкерлері тұрғындарға қауіпсіздік шараларын сақтау қажеттігін еске сала отырып, өңірдің су айдындарында профилактикалық рейдтер, оның ішінде тәуліктің түнгі уақытында тұрақты жүргізуде. 

- Көктемгі кезеңге ерекше назар аударылады, бұл мұзға шығудың ең қауіпті уақыты болып саналады. Жылудың басталуымен мұз қабаты өзінің беріктігін тез жоғалта бастайды. Сыртқы беті тұрақты болып көрінгенімен, мұз құрылымын өзгертіп, әлсірей бастайды, - делінген хабарламада. 

ТЖД мәліметтері бойынша, қыс мезгілінің басынан бастап қарапайым қауіпсіздік ережелерін сақтамау жағдайлары тіркелді. Адамдардың қауіпті мұзға шығуының үш фактісі, сондай-ақ көліктің мұз астына түсіп кетуінің үш жағдайы анықталды. 

ТЖД қызметкерлері осы кезеңде мұзға шығуға және оның үстіне автокөлікпен шығуға қатаң тыйым салынатынын атап өтті. Кейбір азаматтар ескертулерді елемей, өз өміріне ғана емес, айналасындағылардың өміріне де қауіп төндіреді. 

Құтқарушылар аймақ тұрғындары мен қонақтарын барынша сақ болуға және көктемгі кезеңде мұзға шығудан бас тартуға шақырады. 

Төтенше жағдай туындаған жағдайда дереу 112 нөмірі бойынша көмекке жүгіну қажет.