Оқушы ұлттық құндылықтардың сабақтастығын растады, деп хабарлайды @Pavlodarnews.kz тілшісі.

Қалада алтыншы республикалық «Мәшһүр Жүсіп оқуларының» облыстық кезеңі өтті. Шаһардың дарынды балаларға арналған №8 лицейінің тоғызыншы сынып оқушысы Жүсіп Бөрібай, белгілі қазақ ағартушысының шөбересі, байқау жүлдегерлерінің бірі атанды. Іс-шара Мәшһүр Жүсіп атындағы орта мектепте ұйымдастырылып, үш қала мен тоғыз ауданнан келген 80-ге жуық қатысушыны жинады.

Байқауда Жүсіп Бөрібай ағартушының шығармаларын терең талдап таныстырып, ұлттық құндылықтардың бүгінгі күнде де маңызды екенін дәлелдеді. Облыстық білім басқармасының хабарлауынша, оқушы бірнеше жылдан бері байқауға қатысып келеді және ата-бабаларының дәстүрін құрметтеуді жалғастырып отыр.

Аталмыш лицейде Жүсіп Күнантай есімді тағы бір шөбересі де білім алады. Ол информатика мен бағдарламалауға қызығып, олимпиадаларда жиі жүлделі орын алады. Лицейдің оқу ісі жөніндегі орынбасары Қарагөз Ыдрысованың айтуынша, екі бала да жан-жақты дамыған және мектеп өміріне белсенді қатысады.

– Жақсы тәрбиеленген, ізетті балалар. Сабақтарын ешқашан негізсіз қалдырмайды. Сабақтан кейін үйірмелерге қатысып, спорттық секцияларда шыңдалады және мектептегі барлық шараларға атсалысады, – деді ұстаз.

Облыстық кезең бес бағыт бойынша өтті. Қазылар алқасының шешімімен 39 қатысушы жеңімпаз және жүлдегер атанды. Гран-при иегерлері мамыр айында Екібастұзда өтетін республикалық кезеңге жолдама алды.