Онда соғыстан оралған Ұлы Отан соғысына қатысушылардың тағдыры жазылды, деп хабарлайды @Pavlodarnews.kz тілшісі.

Ұлы Жеңістің 80 жылдығына орай облыстық Ардагерлер кеңесінде «Жеңімпаздар» сериясының жетінші кітабының тұсаукесері өтті. 

Онда облыстық ардагерлер кеңесінің мүшесі, жоба авторы Халел Әкімхановтың басшылығымен редакциялық алқа 2010 жылы бастаған көп жылдық мұрағаттық және баспа жұмыстарының қорытындылары жүйеленді.

Жаңа томда 509 батыр туралы өмірбаяндық мәліметтер жинақталған. Онда соғысқан және соғыстан кейінгі жылдары аймақты алға жетелеген – өңір тұрғындарының және Кеңес Одағының түкпір-түкпірінен Павлодар Ертіс өңіріне келгендердің тағдыры жазылған. Кітап 700 данамен жарық көрді.

Бұл ретте, облыс әкімінің орынбасары Айгүл Мәлікова тарихи шындықты сақтаудың және жастарға патриоттық тәрбие берудің маңыздылығын атап өтті.

– Бүгінгі тұсаукесер – орасан зор және қажырлы еңбектің нәтижесі. Осы жобаны жүзеге асыруға үлес қосқандардың барлығына алғыс айтамыз. Ұлы Жеңіс –  біздің ортақ тарихымыз және біз оны болашақ ұрпақ үшін сақтауымыз керек. Мұндай басылымдар алдағы уақытта да шығады деп үміттенеміз және басылымның жалғасын қолдауға дайынбыз, – деді Айгүл Мәлікова.

Тұсаукесер барысында Халел Әкімхановқа Қазақстан Республикасы Мәдениет және спорт министрлігінің «Архив саласының үздігі» төсбелгісі табысталды.

Сондай-ақ, облыс әкімі мен ардагерлер кеңесінің атынан кітап шығаруға атсалысқандарға алғыс хаттар табысталды.

Жобаның редакциялық алқасының мүшесі, облыстық Қазақстан халқы Ассамблеясының «Ақсақалдар алқасы» орынбасары Василий Рак ардагерлер ұйымдарының мұрағаттық деректерінен басқа ақпарат жинау барысында майдангерлердің туыстары арқылы ақпарат іздеп, географиялық және өмірбаяндық мәліметтерді нақтылағанын айтты.

–  Бүгін жарық көрген кітапта бәрін толық көрсеттік. Партизан отрядтарында соғысқандар, сондай-ақ, біздің аймақты қалпына келтіруге келгендер –  олардың барлығы есте қалуға лайық. Кітап енді кітапханалар мен мектептерде қолжетімді болады, –  деді Василий Рак.

Редакция алқасының мүшесі, Мемлекеттік қызметтің еңбек ардагері Марат Молшин басылымның Павлодар облысының тумалары туралы ғана емес, соғыстан кейін осында келгендер, аймақтың дамуына үлес қосқандар және осы аймақтарда тұратындар туралы екенін де атап өтті. 

28 мыңнан астам павлодарлықтар майданда өз өмірлерін қиды, олардың 12 мыңға жуығы хабар-ошарсыз кетті. Олардың есімдері «Боздақтар» атты естелік кітапта жазылған. «Жеңіс» жинағының айырмашылығы – соғыстан тірідей оралып, бейбіт өмірге және елді қалпына келтіруге үлес қосқандарға арналған.

Бүгінгі таңда Павлодар облысының ардагерлер ұйымында 140 мыңнан астам зейнеткер, оның ішінде Ұлы Отан соғысының қатысушылары, блокадашылар, лагерь тұтқындары мен тыл еңбеккерлері бар.