Жедел жәрдем қызметкерлері соңғы екі тәулікте алты өтінімді пысықтады, деп хабарлайды @Pavlodarnews.kz тілшісі.

Облыстық жедел жәрдем станциясының мәліметінше, ауа райының қолайсыздығына байланысты станциясының құрамына кіретін медициналық авиация қызметкерлері әрбір шақыруды жерүсті көлігімен орындауға мәжбүр.

Дәрігерлер екі тәулік ішінде Екібастұзға үш рет барды. 19 желтоқсанда өкпе плеврасының эмпиемасы бар екі жасар қызды жергілікті ауруханадан облыстық балалар ауруханасына тасымалдау қажет болды. Өтінімді реаниматологиялық бригада төрт сағатқа жетпестен пысықтады. 20 желтоқсанда Екібастұз перзентханасынан өңірлік перинаталдық орталыққа медициналық авиация жүктіліктің 31 аптасында 35 жастағы әйелді ауыр дәрежелі преэклампсиямен, ал қалалық ауруханадан Павлодар кардиоорталығына миокард инфарктісімен ауырған 64 жастағы әйелді жеткізді.   

– Инфаркт алған тағы бір науқас Павлодарға Железиннен жеткізілді,  – дейді медициналық авиация меңгерушісі Алмагүл Бесембинова. – Түнде аудандық ауруханаға түскен ер адамға мамандандырылған көмек қажет болды. Онымен бірге реаниматолог және медбике болды.    

Сонымен қатар, дәрігерлер менингитпен ауыратын науқасты модульдік инфекциялық ауруханаға ауыстыру үшін Ақсуға барды. 21 жастағы жас жігіттің ұстамалы синдромы жағдайды қиындатқан соң өтінішті инфекционист, реаниматолог және медбикеден тұратын медициналық топ пысықтады.

Тағы бір өтінім 20 желтоқсанда Аққулы аудандық ауруханасынан түсті. Жол-көлік оқиғасынан зардап шеккен 19 жастағы жас жігітті Павлодарға тасымалдау қажет болды. Медициналық авиация оны түрлі сынықтармен және көгерген жаралармен №1 Павлодар қалалық ауруханасының политравма бөлімшесіне жеткізді.

– Тек 20 желтоқсанда бес өтінім түсті, оларды барынша қысқа мерзімде пысықтадық, – дейді Алмагүл Бесембинова.  

Айтуынша, жалпы өңір бойынша әлі де әуе кемесімен Павлодарға жеткізу қажет ауыр науқастар бар. Бірақ метеожағдайларға байланысты мұндай мүмкіндік болмаған соң әрбір қоңырауды жерүсті көлігімен  орындауға тура келуде.