Жылу станциясындағы қалған үш қазандық жұмысқа толық дайын және іске қосылған, деп хабарлайды @Pavlodarnews.kz тілшісі.

Екібастұз қаласының әкімі Аян Бейсекиннің мәліметінше, Шідерті кентінің жылу, сумен жабдықтау және су бұру нысандары Қаныш Сәтбаев атындағы канал кәсіпорнынан коммуналдық меншікке қабылданғаннан кейін екінші жыл қатарынан негізгі және қосалқы жабдықтарға кеңейтілген ағымдағы жөндеу жүргізіліп жатыр.

Биылғы жұмыстар Павлодар облысының әкімі Асайын Байхановтың қолдауымен бекітілген жоспарға сәйкес орындалған.

– Станциядағы төрт қазандықтың үшеуі толық дайын және жұмыс істеп тұр. Бір қазандықтың жөндеуін бекітілген жоспарға сәйкес қараша айында аяқтаймыз, – деді Аян Бейсекин.

Соңғы жылдары алғаш рет кенттің жылу желілерінде гидравликалық сынақтар жүргізіле бастады. Желілердің бір бөлігі былтыр және биыл жөндеумен қамтылса, қалған учаскелер алдағы жылдардың жоспарына енгізілген.

Қала әкімінің айтуынша, қызмет көрсетуші ұйым жылыту маусымын штаттық режимде өткізуге қажетті ресурстармен толық қамтамасыз етілген.

– Жылыту маусымының өтуі облыс басшылығының бақылауында және менің күнделікті бақылауымда, – деді Аян Бейсекин.

Шідертідегі жылумен қамту жүйесін жаңарту жұмыстары төртінші қазандық жөнделіп біткеннен кейін де перспективалық жоспарға сәйкес жалғасады.