Биылғы сома төрт миллион теңгеден асып кетті, деп хабарлайды @Pavlodarnews.kz тілшісі.

Облыстық мамандандырылған ауданаралық әкімшілік соты 2025 жылдың 11 айында әкімшілік талап қоюларды қарау барысында жалпы сомасы 4 207 240 теңгені құрайтын 48 ақшалай өндіріп алуды қолданды. Қазіргі уақытта оның 3 892 700 теңгесі орындалып, республикалық бюджетке түскен. Қалған өндіріп алулар бойынша төлеу мерзімі әлі өткен жоқ.

– Салыстырмалы түрде, 2024 жылдың он бір айында сот 2 621 320 теңге сомасындағы 32 ақшалай өндіріп алу шарасын қолданған болатын. Бұл деректер процестік мәжбүрлеу шараларының қолданылуының артып келе жатқанын көрсетеді, – делінген хабарламада.

Процестік мәжбүрлеу шараларына 29 облыстық басқарма мен департамент тартылған, оның ішінде Ақсу қаласының жұмыспен қамту және әлеуметтік бағдарламалар бөлімі және Павлодар облысының ішкі мемлекеттік аудит департаменті сияқты бірнеше рет жауапкершілікке тартылған мекемелер бар. Сондай-ақ, бес жеке сот орындаушысы, алты заңды тұлға, екі жеке тұлға, бір талап қоюшының өкілі және бес мемлекеттік мекемелердің басшылары ақшалай өндіріп алуға тартылған.

Сот тәжірибесінде лауазымды тұлғаларды, яғни әкімшілік органдардың бірінші басшыларын процестік мәжбүрлеу шараларына тарту жиі қолданылады, себебі ұқсас бұзушылықтар қайталанып отырады. Әкімшілік процеске қатысушыларды ақшалай өндіріп алуға тартуға іс жүргізу құқығын теріс пайдалану және міндеттерін орындамау, соттың талабын немесе сұрау салуын орындамау, сотқа уақтылы хабарламау, пікірді уақтылы ұсынбау және сот шешімін орындамау сияқты негіздер себеп болады.