Шалғай жерлерде кадрлар саны шектеулі, деп хабарлайды @Pavlodarnews.kz.

Бүгінгі таңда өңірде орта білім беру ұйымдарында 18 директор зейнет жасында болса да, қызметін жалғастырып келеді.

Сонымен қатар, облыс мектептеріндегі директорлық бос орындардың үлесі 13 пайызды құрайды, атап айтқанда 45 орын.

–  Айта кетерлігі, бос орындардың басым бөлігі ауылдық және шалғай елді мекендерге тиесілі. Бұл жерлерде үміткерлер арасындағы бәсекелестік деңгейі төмен және білікті кадрлардың саны шектеулі. Мұндай жағдай басшыларды уақтылы тағайындауды қиындатады және мамандарды іріктеу мен орнықтыру үшін қосымша шараларды қажет етеді, – деді облыстық білім беру басқармасында.

Қазіргі уақытта директорларды тағайындауға конкурс өткізу жұмыстары жүргізілуде.

Бұдан бөлек, биыл 13 резервист оқытудан өтуде. Кадрлық резервтің қорытынды кезеңі аяқталған соң оларды облыс білім беру ұйымдарына тағайындау жоспарлануда.

Сонымен қатар, қазіргі таңда облыстық кадрлық резервте 46 резервист білім алуда. Өңірде кадрлық резервті жаңарту және сүйемелдеу бойынша кешенді жұмыстар жүргізілуде. Бұл жұмыстардың аясында оқыту семинарлары, кеңес беру, тәлімгерлік бағдарламалар және басқарушылық құзыреттерді бағалау шаралары ұйымдастырылуда.

Аталған шаралар білім беру жүйесінің тұрақтылығын қамтамасыз етуге, тиімді басқарушы корпус қалыптастыруға және Павлодар облысындағы оқу үдерісінің сапасын арттыруға бағытталған.