Өңірде «Қауіпсіз қала» жобасы аясында алдағы үш жыл ішінде 4 200 бейнебақылау камерасы орнатылады, деп хабарлайды @Pavlodarnews.kz тілшісі. 

Камералардың 600-і жасанды интеллектке негізделген аналитикалық мүмкіндіктерге ие болады. Бұл жол қозғалысының ережелерін бұзуды, қоғамдық тәртіпті бұзатын әрекеттерді, сондай-ақ өрт қауіпсіздігі мен судағы қауіпсіздікті бақылап, жауапты органдардың жұмысын едәуір жеңілдетпек.

Алайда, неліктен ақылды камералардың саны шектеулі деген сұрақ туындайды. Оған облыстық цифрлық технологиялар басқармасының басшысы Ағыбай Әмірин жауап берді.

– Сіздер «терабайт» деген ұғыммен таныс шығарсыздар, ал «петабайт» туралы естігендер аз. Бір петабайт – мың терабайт. Барлық камералардан түсетін ақпаратты сақтау үшін 7,4 петабайт көлемінде сақтау қажет. Ал егер оған аналитика қосылса, бұл көрсеткіш бірнеше есе өседі. Оның үстіне, барлық деректерді сақтап қана қоймай, энергия көздері мен сапалы интернет те керек. Мұның бәрі айтарлықтай қымбатқа түседі, – деді ол.

Сонымен қатар, басқарма басшысының айтуынша, бұл технологияның бір артықшылығы бар. Жасанды интеллектті қажет болған жағдайда кез келген камераға қосуға болады. Жобаның мердігері – «Antarium Group» ЖШС. Компания полицейлердің сұрауы бойынша бірнеше минут ішінде кез келген бейнебақылау құрылғысын «ақылдыға» айналдыра алады.

Камералар жол қозғалысының ережелерін бұзуды, қоғамдық тәртіпті бұзатын әрекеттерді, сондай-ақ өрт қауіпсіздігі мен судағы қауіпсіздікті бақылайды. Жоба құқық бұзушылықтарды тек мониторинг пен фиксациялаумен шектелмейді. Бейнеаналитика деректерді өңдеп, тәуекелдерді қылмыс немесе оқиға орын алмай тұрып анықтауға мүмкіндік береді.

Жоба нәтижесінде өңірде жол-көлік оқиғаларының санын 20 пайызға, қылмыс деңгейін 19 пайызға азайту, ал қылмыстардың ашылуын 90 пайызға жеткізу жоспарланып отыр.

Еске сала кетейік, жоспар бойынша барлық камера 2025 жылдың қазан айының соңына дейін толық орнатылып, іске қосылады.

Жыл басынан бері жол қозғалысы ережелерін бұзу деректері бойынша 400 миллион теңгеден астам айыппұл салынған. Барлық айыппұл облыстық бюджетке түсуде.