Бұл марапат биыл алғаш рет тағайындалды, деп хабарлайды @Pavlodarnews.kz тілшісі.

«Қазақстан Республикасының Конституциясына 30 жыл» мерейтойлық медалімен Баянауыл ауданының еңбек ардагері Мұхтар Әбенов, Павлодар облысының қоғамдық кеңесінің төрағасы Бәкір Демеуов, еңбек ардагерлері Виктор Денисенко, Мұрат Қайыргелдин және Александр Рюмкин, Павлодар облысы сайлау комиссиясының төрағасы Гүлнәр Аманжолова, «Татуласу орталығы» басшысы Марина Иванова,  «SENIM» денсаулық сақтау қызметкерлері кәсіподағының облыстық филиалының төрағасы Салтанат Төлегенова, сондай-ақ облыстық ардагерлер кеңесінің төрағасы Рымтай Шөкеев марапатталды.

Облыс әкімі Асайын Байханов Конституция еліміздің негізгі заңы ғана емес, бірліктің, әділеттілік пен өркендеудің символы екенін атап өтті.

 – Осы құндылықтардың барлығы сіздердің, тәуелсіз Қазақстанның бастауында тұрған құрметті ардагерлердің арқасында қаланды және еселенді. Сіздердің еңбектеріңіз, жоғары кәсібиліктеріңіз бен жауапкершіліктеріңіз Павлодар облысының және еліміздің дамуына орасан зор үлес қосты. Сіздерді марапаттарыңызбен шын жүректен құттықтаймын және белсенді азаматтық ұстанымдарыңыз үшін алғыс айтамын, – деді өңір басшысы.

Марапатқа ие болған азаматтар Конституцияның мерейтойлық жылында награда алу – үлкен абырой мен мақтаныш екенін атап өтіп, олардың қызметіне берілген жоғары баға үшін алғыстарын білдірді.