Ағымдағы жылы жалпы сомасы 800 млн теңгеден асатын төрт маңызды жоба іске асырылды және аяқталды, деп хабарлайды @Pavlodarnews.kz тілшісі.

«AMANAT» партиясының облыстық филиалында азаматтық қоғам мен аймақтың мәдени саласын дамытудың ең өзекті мәселелері талқыланатын «Miras» кеңесінің кезекті отырысы өтті.

Кеңес отырысын ашқан төраға Дулат Абетжанов мәдениеттің жай ғана ғимараттар мен сахналардан тұрмайтынын, ол қоғамның рухани іргетасы екенін атап өтті. Осыған байланысты, әрбір жоба, жөнделген әрбір ауылдық кітапхана немесе Мәдениет үйі жалпыұлттық құндылықтарды нығайтуға қосылған үлес болып табылады.

Күн тәртібінде партияның сайлауалды бағдарламасын іске асыру барысы, атап айтқанда, мәдениет нысандарын салу және жөндеу жұмыстарының жағдайы қаралды. Мәдениет және құрылыс басқармаларының өкілдері қандай жұмыстар аяқталғаны, қай жерде белсенді кезең жүріп жатқаны және қосымша шешімдерді қажет ететін нысандар туралы толық есеп берді.

«Ауыл – ел бесігі» бағдарламасы бойынша 2025 жылы өңірде жалпы сомасы 872,1 млн теңгені құрайтын төрт маңызды жоба іске асырылуда. Атап айтқанда, Ақтоғай ауданы Мүткенов ауылындағы Мәдениет үйіне 142,8 млн теңгеге күрделі жөндеу жұмыстары жүргізілуде. Май ауданы Басқұдық ауылындағы Мәдениет үйіне 271,4 млн теңгеге жөндеу жұмыстары жүргізіліп, оның 184,8 млн теңгесі игерілген. 1 сәуірде басталған жұмыстар толығымен аяқталып, нысан 31 шілдеде ресми түрде қабылданған. Павлодар ауданы Ефремовка ауылындағы Мәдениет үйіне 149,9 млн теңгеге жөндеу жүргізіліп, 12 мамырда басталған жұмыстар 4 қыркүйекте қабылдау актісін алған. Тереңкөл ауданы Ивановка ауылындағы Мәдениет үйіне 300,9 млн теңгеге жөндеу жұмыстары жүргізіліп, 80 млн теңге игерілген, жұмыстар сәуірдің 25-і күні басталып, тамызда аяқталған.

Сонымен қатар, Жетекші ауылындағы Мәдениет үйінің құрылысы жалғасуда, оның дайындығы 92%-ды құрайды. Ақсу ауданындағы Алғабас ауылында 250 орындық мәдени-демалыс орталығының құрылысы жоспарға сәйкес жүріп жатыр, бұл нысан Ақсу үшін маңызды орталықтардың бірі болмақ.

Талқылау барысында Кеңес мүшелері Успен ауданындағы жағдайға ерекше назар аударды. Қаратай ауылындағы Мәдениет үйі ауыл мектебінің ғимаратында орналасқан, бұл мәдени мақсаттағы нысандарға қойылатын талаптарға сәйкес келмейді. Бүгінгі таңда жаңа Мәдениет үйінің құрылысы бойынша жұмыс жобасы әзірленіп, оң қорытынды алғанымен, жобаға қаржы бөлінбеген. Бұл мәселе партияның сайлауалды бағдарламасының осы бағыт бойынша орындалмау қаупін тудырып отыр. Кеңес мүшелері бұл мәселені жеке бақылау блогына шығаруды ұсынды.