Көбінесе қарағай, көктерек, қайың ағаштарын кеседі, деп хабарлайды @Pavlodarnews.kz.

Бұл туралы Павлодар облыстық орман шаруашылығы және жануарлар дүниесі аумақтық инспекциясының басшысы Руслан Тулепбаев  мәлім етті. 

– Биыл орманды заңсыз кесудің 31 фактісі анықталды. Орманның зардап шеккен көлемі – 403 мың шаршы метрді, шығын мөлшері 8 миллионнан астам теңгені  құрайды, – деді Руслан Тулепбаев.

Оның сөзінше, былтыр осы кезеңде ағашты заңсыз кесу 25 фактісі болған. Яғни, құқық бұзушылық жағдайлары азайған. 

– Шалдай резерваты бойынша қарағай, әкімдіктің қарамағындағы орман мекемелерінде көктерек және қайыңды кесіп отырады. Үрлітүп, Максим-Горький орман және жануарлар әлемін қорғау жөніндегі мекемесінде жапырақты ағаштар: терек және қайыңды заңсыз кеседі, – деді Руслан Тулепбаев.

Биыл орманды заңсыз кесу бойынша сотта екі әкімшілік іс қаралып,  мөлшері 1242 мың теңге айыппұл салынған, 415 мың теңге келтірілген зиянды өтеуге талап-арыз берілді. 

Оған қоса ағаш сүректерді кесудің белгіленген уақыты бар. Бұл 1 қаңтар - 31 желтоқсанға дейінгі кезең болып табылады.

– Кесуге жататын ағаштар аймағын бөліп беру жұмыстары жыл сайын жүргізілуде. Ағаш сүректерін жіберудің көлемі анықталып, бекітіледі. Белгілі санитарлық кесуге жатқызылатын,  ауруға шалдыққан, кепкен, қураған екпелер шабуға шығарылады, – деді спикер. 

Егер белгіленген учаскеде  заңсыз ағаш кесу жағдайы орын алған болса, заңды бұзған тұлғаға ҚР Әкімшілік-құқық бұзушылық Кодексінің 381-1-бабына сәйкес 100-ден 1000-дейін айлық есептік көрсеткіш мөлшерінде айыппұл салынуы мүмкін.