Соңғы тексерулер нәтижесінде тұтынушылар үшін картоп, сәбіз, қарақұмық және басқа да өнімдер айтарлықтай арзандады, деп хабарлайды @Pavlodarnews.kz тілшісі.

Облыстық Сауда және тұтынушылардың құқықтарын қорғау департаменті 2025 жылдың алғашқы тоқсанында жүргізген тексерулердің нәтижесінде әлеуметтік маңызы бар азық-түлік тауарларының бағасын төмендетуге қол жеткізді. Әлеуметтік маңызы бар тауарлардың бағасын қадағалау мақсатында жүргізілген жоспардан тыс және профилактикалық бақылаулар барысында картоп, сәбіз, қарақұмық, тауық еті және басқа да өнімдердегі сауда үстемелері бақылауға алынып, заң бұзушылықтар анықталды.

Әлеуметтік маңызы бар азық-түлік тауарларына қатысты сауда үстемесі 15%-дан аспауы тиіс деген талапқа сәйкес, департамент 58 сауда субъектісіне әкімшілік шаралар қолданды. Нәтижесінде, кейбір өнімдерге бағаның едәуір төмендегені байқалды. Мәселен, картоптың бағасы 330 тг/кг-дан 184 тг/кг-ға, сәбіздің бағасы 105 тг/кг-дан 69 тг/кг-ға дейін арзандады. Сонымен қатар, тұздың бағасы 120 тг/кг-дан 109 тг/кг-ға, қарақұмықтың бағасы 450 тг/кг-дан 339 тг/кг-ға дейін түсті.

Департаменттің мәліметінше, тексерулер Павлодар, Екібастұз, Ақсу қалаларында және Тереңкөл ауданында жүргізілді. Тексерулер нәтижесінде 43 жоспардан тыс тексеру және 25 профилактикалық бақылау өткізіліп, барлық сауда нүктелерінде заңға сәйкес талаптардың орындалуын қамтамасыз ету мақсатында шаралар қабылданды.

Егер тұтынушылар әлеуметтік маңызы бар азық-түлік тауарларының бағасының жоғары екенін байқаса, олар департаментке арызбен жүгініп, бұзушылықтың фото суреттерін, чектерді және басқа да құжаттарды қоса тіркей алады. Департаменттің кеңсесі Павлодар қаласы, Генерал Дүйсенов көшесі, 9, 3-қабат, 304-кабинетте орналасқан. Кеңес алу үшін +7(7182)55-10-70 телефонына хабарласуға немесе Е-өтініш порталы арқылы арыз жіберуге болады.