Жоғары сапалы тепловизорларды орнату желтоқсан айының соңына дейін аяқталады, деп хабарлайды  @Pavlodarnews.kz тілшісі.

Аумақтық инспекцияның мәжіліс залында 2023 жылғы өрт қауіпті кезеңінің қорытындысы бойынша мәжіліс өтті. Табиғи резерваттың табиғи кешен және нысана қорғау бөлімінің басшысы Қобыланды Атығаев баяндама жасады.

– Резерват аумағында жоғары сапалы тепловизорлары бар жүйе орнату орман және дала өрттерін ерте анықтауға мүмкіндік береді. Желтоқсан айының соңына дейін аяқтау жоспарланып отыр. Сонымен қатар, резерваттың материалдық-техникалық базасы жарықтандырылуда. Атап айтсақ, биылғы жылы үш КамАЗ өрт сөндіру автомашинасы және бір жүктиегіш машинасы сатып алынды, – деді Қобыланды Атығаев.

Резерват мәліметі бойынша, биылғы жылы орман өрттерін алдын алу  мақсатында 570 шақырым минералданған жолақтар салынды, 10140 шақырым қолданыстағы минералданған жолақтарға күтім жасалды, білім беру ұйымдарында табиғат қорғау тақырыбында 21 дәріс өткізілді, өрт қауіпсіздігі ережелерін сақтау бойынша ауыл шаруашылығы құрылымдарына 82 ұйғарым мен хабарлама берілді, 932 парақша таратылды, 30 аншлаг жаңартылды және орнатылды.

2023 жылы резерват аумағында 133 орман өрті тіркелген, оның ішінде 127 жағдай – найзағай салдарынан, бес жағдай – белгісіз себептерден, бір жағдай – тұрғындардың кесірінен. 

Өрт шалған жалпы орман алқабы – 1279,8 гектар. Орман алқабы емес (шабындық жерлер) аумағы – 310,6 гектар.

Орман өрттерінен келтірілген залал 229420,6 мың теңгені құрады, оның ішінде өртті сөндіруге 7969,6 мың теңге жұмсалды.