Жергілікті билік ескі теректерді жөке ағаштарына алмастырмақ, деп хабарлайды @Pavlodarnews.kz тілшісі.

Павлодар қаласы әкімінің орынбасары Әнуарбек Амановтың айтуынша, биылғы көктем мен күзде отырғызылатын ағаштардың саны 20 мың түпті құрайды.

Қаладағы Астана, Едіге би, Торайғыров және Бектұров көшелерінің бойында жасыл желектерді қалпына келтіру жұмыстары жүргізіледі. Қазір Шөкин көшесінің бойына ағаш отырғызу жобасы қарастырылуда.

Ағаш отырғызу келісімі үш жылға жасалған, яғни осы жылы аяқталады. Бұл жұмыстарға бөлінген қаржы шамамен 700 миллион теңгені құрады.

Дендрологиялық жоспарға сәйкес ескі терек ағаштары жөке ағаштарына ауыстырылады.

– Жергілікті тұрғындар тарапынан көптеген шағым түсті. Ағаштарды себепсіз кеспейміз. Мамандармен ағаштардың түрлік құрамы мен жасын, ауру ағаштарды анықтадық. Кәрі ағаштар жас ағаштар сияқты ауаны тазара алмайды, сондықтан біз аллея ағаштарын отырғызуды жөн көрдік, – деп түсіндірді әкімнің орынбасары.

Өткен жылы отырғызылған ағаштардың жерсіну көрсеткіші 98,7 пайызды құрады.

– Мәселен, 2024 жылы Астана көшесіндегі 30 ағашты кесіп, олардың орнына 70-ке жуық жаңа жөке ағаш отырғыздық. Біз барлығын ғалымдардың ұсыныстары бойынша жасаймыз, сондықтан жерсіну деңгейі жақсы, – деді Әнуарбек Аманов.

Сонымен қатар, биыл қаланың орталық, оңтүстік және шығыс бөлігінде ағаштарды кесу жоспарлануда.