Шараға облыстық мәдениет ұжымдары мен республикаға танымал эстрада жұлдыздары қатысып, ерекше көңіл-күй сыйлады, деп хабарлайды @Pavlodarnews.kz тілшісі. 

Павлодар облысының  «Ertis Promenade» сахнасында Конституция күніне арналған мерекелік іс-шара ұйымдастырылды.

Концерттің ұйымдастырушысы Данияр Жұмаділ мерекелік кешке дайындықтың ұзақ әрі ауқымды жүргізілгенін тілге тиек етті. 

 – Кез келген мәдени іс-шараға дайындық көп уақыт алады. Әсіресе биылғы мерекенің орны ерекше, себебі Конституциямыздың қабылданғанына 30 жыл толып отыр. Бұл – жай күн емес, ел тарихындағы маңызды белес. Сол себепті біз екі айға жуық уақыт бойы жоспарлы әрі мұқият дайындалдық. Өздеріңіз куә болғандай, біз мемлекеттік туымызды көтеріп, рекорд орнаттық. Кеш барысында Әнұран шырқалып, көпшілікке ерекше рух сыйлады, – деді ол.

Концерттің негізгі бағдарламасына облыстық Шаңырақ орталығы мен Иса Байзақов атындағы облыстық филармонияның өнерпаздары түгелдей қатысты. Сахнаға ансамбльдер, оркестрлер, би топтары шығып, көрермендерге әсем әуен мен ұлттық билерді тарту етті.

Сонымен қатар, республикалық деңгейдегі танымал өнерпаздар шақырылды. Олардың қатарында қазақстандық эстраданың сүйікті әншісі Нұржан Керменбаев, этно-топ Ұлытау, «Бәйтерек» және «Абырой» топтары бар.

Кештің басты қонақтарының бірі – этно-топ «Ұлытау» Павлодарға алғаш рет келіп отыр. Ұжым қазақтың дәстүрлі күйлерін домбырамен орындап, оны классикалық және рок музыкамен үйлестіріп, тыңдармандарға ерекше музыкалық туындыларын ұсынды. Ал Нұржан Керменбаев – облыс тұрғындарына бұрыннан таныс әнші. Ол сахна төрінде халық сүйіп тыңдайтын хит әндерін орындап, көрермендердің ыстық ықыласына бөленді.

Ұйымдастырушылардың айтуынша, концертке қатысқан өнерпаздар жақсы дайындалған. Себебі сахнаға әртүрлі ұжымдар, ансамбльдер, оркестрлер мен бишілер топтары шықты.

— Бұл біздің алғашқы үлкен іс-шарамыз емес. Осы сахнада әлемдік деңгейдегі жұлдыздар да өнер көрсеткен. Сондықтан техникалық жағынан ешқандай қиындық туған жоқ. Әрбір әртіске қажетті аспаптар мен құрал-жабдықтар дайын тұрды, – деді ұйымдастырушылар.

Жаңбыр жауып тұрғанына қарамастан, қала тұрғындары мен қонақтары  екі сағатқа созылған музыкалық бағдарламадан тамаша әсер алып, ел тәуелсіздігі мен Ата Заңымыздың мерейін бірге тойлады.